काठमाण्डौ । १६औं संस्करणको युरो कप २०२० फुटबलको सेमिफाइनल समीकरण पूरा भएको छ । युरोपका विभिन्न ११ सहरमा भइरहेको युरोकप फुटबलमा गएराति इङ्ल्यान्ड र युक्रेनबीचको खेल सकिएसँगै सेमिफाइनल समीकरण पूरा भएको हो ।

गएराति भएको अन्तिम क्वाटरफाइनल खेलमा युक्रेनलाई ४–० गोलले पराजित गर्दै इङ्ग्ल्यान्ड सेमिफाइनलमा प्रवेश गरेको छ । यस्तै अन्तिम दोस्रो खेलमा चेक रिपब्लिकलाई हराउँदै डेनमार्क सेमिफाइनलमा प्रवेश गरेको छ । चेक रिपब्लिकलाई २–१ गोलले पराजित गर्दै डेनमार्क सेमिफाइनलमा प्रवेश गरेको हो ।

यसैगरी गएराति भएको दुई खेलमा स्पेनले स्विटजरलेण्डलाई पेनाल्टी सुटआटमा ३–१ले पराजित गरेको थियो भने इटलीले विश्वनम्बर वान बेल्जियमलाई २–१ गोल अन्तरले पराजित गर्दै सेमीफाइनलमा प्रवेश गरेको हो ।

इङ्ग्ल्यान्ड, इटली, स्पेन र डेनमार्क युरोकपको अन्तिम चारमा प्रवेश गर्न सफल भएका छन् । सेमीफाइनलमा इटली र स्पेनबीचको खेल बुधवार राति १२ः ४५ बजे हुनेछ भने डेनमार्कले इङ्ग्ल्यान्डसँग बिहीवार राति १२:४५ बजे प्रतिस्पर्धा गर्ने छ ।

विश्व नम्बर वान बेल्जियम, स्विटजरलेण्ड, येक्रेन र चेक रिपब्लिकले अन्तिम ८ मा स्थान बनाउँदै युरोकप २०२० बाट विदा भएका छन् ।