लिम्बुवानखबर । युरो २०२० को १६ औं संस्करणको फाइनलमा उपाधिका लागि इटली र इंग्ल्याण्ड भिड्ने पक्का भएको छ । दुवै टोली अपराजित रहँदै फाइनलमा पुगेका हुन् ।

एक पटक युरो कप विजेता इटली ९ वर्षपछि फाइनल पुगेको हो । इटलीले यस अघि सन् १९६८ मा घरेलु मैदानमै युरोकपको उपाधि जितेको थियो । त्यसयता सन् २००० र २०१२ मा फाइनल पुगेको इटली पराजित भएको थियो ।

यता इंग्ल्याण्ड पहिलो पटक युरोकपको फाइनलमा पुगेको हो । उसले सन् १९६६ मा घरेलु मैदानमै विश्वकप जिते यता ५५ वर्षपछि ठूलो प्रतियोगिताको फाइनल पुगेको हो ।

११ देशका विभिन्न शहरहरुमा एकसाथ आयोजना भएको युरोकपमा यस पटक दुवै आयोजक राष्ट्रहरु फाइनल पुगेका छन् । समूह ए मा रहेको इटलीले समूह चरणको सबै खेल घरेलु मैदानमा खेलेको थियो । यसैगरी इंग्ल्याण्डले भने क्वार्टरफाइलबाहेकका सबै खेल घरेलु मैदान वेम्बलीमा खेलेको थियो ।

अब फाइनल खेल पनि आगामी आइतबार इंग्ल्याण्डले घरेलु मैदान वेम्बलीमा नै खेल्नेछ ।

समूह चरणको तीनवटै खेल जितेको इटलीले कुनै गोल खाएको थिएन । इंग्ल्याण्डले क्वार्टरफाइनलसम्म एक गोल पनि खाएको थिएन भने सेमिफाइनलमा एक गोल खायो ।

इटलीले फाइनल पुग्दा १२ गोल गरेको छ भने ३ गोल खाएको छ । उता इंग्ल्याण्डले अहिलेसम्म १० गोल गर्दा १ गोल मात्र खाएको छ । इंग्ल्याण्डका कप्तान ह्यारी केनले ४ गोल गरेका छन् उनी गोल्डेन बुटका दावेदार हुन् । सर्वाधिक गोल गर्ने सूचीको १ नम्बरमा पोर्चुगलका क्रिस्टियानो रोनाल्डो रहेका छन् उनको नाममा ५ गोल र १ असिस्ट रहेको छ ।