उर्लाबारी, १५ साउन । नेपाल आदिवासी जनजाति महासंघ नगर समन्वय परिषद् उर्लाबारीको अध्यक्षमा समशेर लिम्बू सर्वसम्मत चयन भएका छन् ।

समितिका उपाध्यक्षहरुमा क्रमशः सूर्य माझी, नारायण धिमाल र सुकुनमुनी बेस्रा, सचिव नारायण चाम्लिङ राई, सहसचिवहरुमा क्रमशः महेशकुमार शाक्य, अञ्जु लिम्बू र सुशिला मगर, कोषाध्यक्षमा रीता तामाङ सर्वसम्मत चयन भएका हुन् ।

त्यस्तै समितिका सदस्यहरुमा क्रमशः गणेशकुमार मगर, तारा श्रेष्ठ, डुक्चे भोटे, बबिता दनुवार, कमल गुरुङ, मनिराज देवान, शिरमाया धिमाल, कविता याक्दा, भीमबहादुर माझी, विरेन्द्र मार्डी, सीता भूजेल र गजेन्द्र तामाङ रहेका छन् ।

लेखा समिति संयोजकमा खगेन्द्रबहादुर भूजेल, सदस्यहरु क्रमशः मनकुमारी राई र नरबहादुर गुरुङ चयन भएका निर्वाचन समिति संयोजक रुद्रबहादुर तामाङले जानकारी दिए । निर्वाचन समितिमा सावित्रा याक्खा र रामकुमार राई सदस्य रहेका थिए ।

शनिबार नवनिर्वाचित समितिलाई पद हस्तान्तरण गर्न आयोजित एक समारोहका बीच प्रदेश नम्बर १ का प्रदेश प्रमुख परशुराम खापुङले नेपालका विविध जाति, भाषा, संस्कृति र पहिचानको समष्टी रूप नै नेपाल भएको बताए ।

सबैको पहिचान स्वकिार नगरिएसम्म देशको एकता बलियो नहुने भन्दै उनले एकले अर्कोको पहिचान स्वीकार्न सक्नुपर्नेमा जोड दिए ।

कार्यक्रमका बीच उर्लाबारी नगरका जेष्ठ आदिवासी जनजाति वृद्धवृद्धालाई नगद र दोसल्ला ओढाएर सम्मान गरिएको थियो ।

समारोहलाई उर्लाबारी नगरपालिकाकी उपमेयर मिनाकुमारी खतिवडा, नेपाल आदिवासी जनजाति महासंघका केन्द्रीय उपाध्यक्ष लहरु जिमी याक्खा, महासंघ प्रदेश नम्बर १ का अध्यक्ष ध्रुव मेन्याङ्बो, धिमाल जातीय विकास केन्द्रका महासचिव मातृका धिमाललगायतले सम्बोधन गरेका थिए ।

मणिलाल श्रेष्ठको अध्यक्षतामा उर्लाबारी उद्योग बाणिज्य संघको सभाहलमा कार्यक्रम सम्पन्न भएको थियो ।