फाइल तस्वीरः
लिम्बुवानखबर । एभरेष्ट प्रिमियर लिग (इपिएल)को चौथो संस्करणमा विजेताले ५० लाख रुपैयाँ पाउने भएको छ । मंगलबार इपिएलले विजेता र उपविजेताले प्राप्त गर्ने पुरस्कारराशीको रकम घोषणा गरेको हो । विजेताले ५० लाख र उपविजेताले १५ लाख रुपैयाँ पाउने भएका छन् ।
यो पुरस्कार राशी नेपाली क्रिकेट इतिहासकै सर्वाधिक ठूलो रकम हो । यसअघि धनगढी प्रिमियर लिग (डिपिएल) क्रिकेटमा सर्वाधिक पुरस्कार ३० लाख रहेको थियो । तेस्रो संस्करणको डिपिएल च्याम्पियन बनेको सिवाइसी अत्तरियाले ३० लाख र उपविजेता महेन्द्रनगर युनाइटेडले १२ लाख हात पारेका थिए ।
यस प्रतियोगिताममा ६ शहरका ६ फ्रेन्चाइज टिम सहभागी हुनेछन् । विराटनगर वारियर्स, काठमाडौं किंग्स ११, चितवन टाइगर्स, ललितपुर प्याट्रियट्र्स, भैरहवा ग्ल्याडियटर्स र पोखरा राइनोजले प्रतिस्पर्धा गर्दैछन् । पछिल्लो पटक २०१८ को इपिएलको फाइनलमा ललितपुरले भैरहवालाई १४ रनले हराउँदै उपाधि आफ्नो पोल्टामा पारेको थियो । यस सिजनमा स्वदेशी खेलाडीको तलब २० प्रतिशतले बढेको थियो । इपिएलको मुख्य प्रायोजकका रुपमा बजाज पल्सर रहेको छ । बजाजले इपिएललाई यस संस्करणका लागि २ करोड ५० लाख रुपैयाँ प्रदान गर्ने आयोजकले जनाएको छ ।
इपिएलको यसपटकको सिजनमा विभिन्न देशका हस्ती खेलाडीहरु सामेल हुँदैछन् । पाकिस्तानी क्रिकेट खेलाडी शाहिद अफ्रिदि काठमाडौँ किंग्स–११बाट, श्रीलंकाका पूर्वकप्तान दिनेश चण्डीमाल भैरहवा ग्ल्याडिएटर्सबाट खेल्दैछन् भन चितवनबाट अफगानिस्तानका ओपनर मोहम्मद शाहजाद, मलेसियाका विरनदीप सिंह, पाकिस्तानका दानिस अजिज र श्रीलंकाका सिक्कुगे प्रसन्नाले खेल्न जनाइएको छ ।
त्यसैगरी पछिल्लो उपाधी विजेता ललितपुरबाट इंग्ल्यान्डका एलेक्स ब्लेक र भुटानका रञ्जंग मिक्यो दोर्जी छन् । पोखराले भने अहिलेसम्म कुनै विदेशी खेलाडी सार्वजनिक गरेको छैन । विराटनगरबाट भने जिम्बावेका अलराउन्डर सिकन्दर राजाले खेल्ने पक्का गरिसकेका छन् ।
Related