लिम्बुवानखबर, १७ भदौं । नेपाल आईसीसी टी–२० वरीयतामा एक स्थान तल झर्दै १३औं स्थानमा ओर्लिएको छ । बुधबारका दिन अन्तर्राष्ट्रिय क्रिकेट परिषद (आईसीसी)ले गरेको नयाँ अपडेटमा नेपालको वरीयता १ स्थान तल खस्किएको हो ।

नेपाल यसअघि १२औं स्थानमा रहेको थियो भने बुधबारबाट नेपालको नयाँ वरीयता १३औं स्थानमा रहेको छ । टेष्ट राष्ट्र आयरल्याण्ड १२औं स्थानमा उक्लिन सफल भए को छ ।

नेपालको आईसीसी टी–२० वरीयतामा हालसम्मको उत्कृष्ट वरीयाता ११औं स्थान हो । टी–२० मा नेपाल हालसम्म टप १० मा पर्न सकेको छैन ।

बुधबार अपडेट नयाँ टी–२० वरीयतामा इंग्ल्यान्ड शीर्ष स्थानमा छ । त्यसैगरी, भारत दोस्रोमा, पाकिस्तान तेस्रोमा, न्युजिल्याण्ड चौथोमा र दक्षिण अफ्रिका पाँचौ स्थानमा रहेको छ भने अष्ट्रलिया छैटौ, बंगलादेश सातौं, अफगानिस्तान आठौं, श्रीलंका नवौं, वेष्ट इन्डिज दशौँ स्थानमा रहेका छन् ।

यसरी नै जिम्बाव्वे ११औं र आयरलैण्ड १२औं स्थानमा रहेको छ ।

नेपाली क्रिकेट टिम आईसीसी विश्वकप लिग–२ अन्तर्गत त्रिकोणात्मक सिरिज खेल्नका लागि हाल ओमानमा रहेको छ । त्यसअघि नेपालले पपुवा न्यु गिनीसँग दुई ओडीआई अन्तर्राष्ट्रिय खेल खेल्ने जनाइएको छ । नेपाल, ओमान र अमेरिका सम्मिलित त्रिकोणात्मक सिरिज सेप्टेम्बर १३ देखि २० सम्म हुनेछ ।

हेर्नुहोस्ः– आईसीसी टि–२० को टप २० टिम