सुनिहाङ्मा मृत्यु प्रकरण : चारै आरोपी धरौटी बुझाएर तारेखमा रिहा

 लिम्बुवान खबर
                       

धरान । धरान ११ की सुनिहाङ्मा लिम्बुको मृत्यु प्रकरणमा पक्राउ परेका ससुरा सहित ४ जना धरौटी बुझाएर बुधवार तारेखमा रिहा भएका छन् ।

जिल्ला अदालत सुनसरीमा थुनछेक बहस पछि आज ५ नम्बर इजलासका न्यायाधीश प्रकाश श्रेष्ठको आदेश अनुसार उनीहरु धरौटी बुझाएर तारेखमा रिहा भएका हुन् । जनही एक लाख ५० हजार धरौटी बुझाएर तारेखमा छोड्न आदेश भएको इलाका प्रहरी कार्यालय धरानका प्रमुख डिएसपी ज्ञानेन्द्र बस्नेतले बताए ।

भदौ २२ गते धरान ११ मा सुनिहाङ्मा लिम्बुको रहस्यमय मृत्यु भएपछि माइती पक्षले किटानी जाहेरी दिए पछि मृतकका ससुरा भीम माबो, आमाजू सज्नु माबो, विमला माबो र हेमकुमार माबोलाई भदौ २४ गते प्रहरीले पक्राउ गरेको थियो ।

माइती पक्षले हत्या आशङ्कामा जाहेरी दिए पनि चारै जनामाथि आत्महत्या दुरुत्साहान मुद्दाको अभियोग मात्रै दर्ता भएको थियो । सोही मुद्दाको थुनछेक बहस मङ्गलवार देखि सुरु भएको थियो । बुधवार दिउसो २ बजे थुनछेक बहस सकिएको हो ।

गत भदौ २२ गते बिहान सुनिहाङ्माले आफ्नै कोठाको पङ्खामा सलले पासो लगाएर झुन्डिएको अवस्थामा भेटिएको भनिए पनि जनप्रतिनिधि, प्रहरी र माइती पक्ष घटनास्थलमा पुग्दा सुनिहाङ्माको शव झराएर बेडमा सुताइएको अवस्थामा फेला परेपछि सुनिहाङ्माको मृत्यु रहस्यमय भएको भन्दै माइती पक्षले प्रहरीमा किटानी जाहेरी दिएको थियो ।

सुनिहाङ्माको मृत्यु प्रकरणमा बुधवार आरोपीहरु छुटे पनि अदालतले अन्तिम फैसला भने गरेको होइन । अझै पनि थुप्रै अनुसन्धानहरु हुने र हरेक महिना आरोपीहरुले तारेख खेप्नुपर्ने डिएसपी बस्नेतले बताए ।

यता माइती पक्षकाले भने सुनिहाङ्मा न्यायिक अभियान समितिको गठन गरी दोषीलाई कारबाही गर्न माग गर्दै आएको छ । यो समितिले अदालतको निर्णयलाई सम्मान गर्दै अझै पनि थुप्रै अनुसन्धानको पाटोहरु बाँकी रहेकोले दोषीलाई कारबाही हुनेमा विश्वस्त रहेको समितिका सहसंयोजक अरुण तिगेलाले बताए ।

विवाह गरेको ३ महिना नपुग्दै सुनिहाङ्माको मृत्यु हुनु, त्यसै पनि रहस्यमय भएको भन्दै समितिले न्यायालयले निष्पक्ष छानबिन गर्ने र मृतकका श्रीमान् आइत माबोलाई नेपाल झिकाएर अदालतमा उभ्याउने विश्वास माइती पक्षको रहेको सहसंयोजक तिगेलाले बताए ।

सम्बन्धित समाचार

चैत्र २५ देखि संघर्ष समितिले निर्णायक आन्दोलन गर्ने

दमक, १६ चैत्र । कोशी प्रदेश नाम खारेजको माग गर्दै आन्दोलन गरिरहेका पहिचानवादीले निर्णायक आन्दोलनका कार्यक्रम घोषणा गरेका छन् । प्रदेश नं १ पुनः नामाङकन संयुक्त संघर्ष समितिले चैत २५ गतेपछि प्रदेश राजधानी विराटनगर केन्द्रित...

कोशी प्रदेश नामाङकनको विरोधमा संघर्ष समितिद्वारा स्थानीय तहमा तालाबन्दी

दमक, १४ चैत । कोशी प्रदेश नामाङकन खारेजीको माग राख्दै आन्दोलनरत प्रदेश नं. १ पुनः नामाङकन संयुक्त संघर्ष समितिले स्थानीय तहहरुमा आजबाट तालाबन्दी शुरु गरेका छन् । प्रदेश १ को नाम पहिचानसहितको पुनः गरिनुपर्ने मुख्य...

लाजेहाङलाई राष्ट्रिय शहीद घोषणा गर्न माग

काठमाडौं, १४ चैत्र । जनता समाजवादी पार्टी (जसपा), नेपालले कोशी प्रदेश नामकरणको विरोधमा भएको आन्दोलनका क्रममा ज्यान गुमाएका पदम लिम्बु (लाजेहाङ्)लाई शहीद घोषणा गर्न माग गरेको छ । जसपाका प्रवक्ता मनिष सुमनले मंगलबार एक विज्ञप्ति...

विराटनगरमा पहिचानवादीहरुको आन्दोलन, हवाई फायर र अश्रुग्याँस प्रहार, २९ भन्दा धेरै घाइते

विराटनगर, १४ चैत्र । मोरङको विराटनगरस्थित होटेल बिगमा कोसी प्रदेशसभाका सांसद सहभागी हुने एक कार्यक्रममा अवरोध गर्न पहिचानवादी नेता–कार्यकर्ताले गरेको प्रदर्शनको क्रम प्रहरी र प्रदर्शनकारी विच झडप हुँदा २९ जना घाइते भएका छन् । दिगो...