दमक। झापाको दमक नगरपालिकाका मेयर दम्पतीको स्वास्थ्यमा सुधार हुँदै गएको नगरपालिकाले जनाएकाे छ ।

मेयर रोमनाथ ओलीको स्वास्थ्य सामान्य बन्दै गएको छ भने उनकी पत्नी लिला (दिलमाया)लाई अहिले नर्मल वार्डमा सारिएको छ । न्युरो अस्पतालमा उपचाररत दुबैमा कोरोना संक्रमण पुष्टि भएको थियो ।

पारिवारिक स्राेतका अनुसार मेयर ओली भने सामान्य भइसकेका छन् । उनमा पखलाको समस्या थियो । यस्तै मेयर पत्नी लिलामा स्वाशप्रश्वासमा समस्या देखिएपछी दमकको आम्दा अस्पतालबाट न्युरो अस्पतालमा रेफर गरिएकाे थियो । एक हप्ता देखि उनीहरु न्युरोमा उपचाररत छन् । छाेरा अनिलका अनुसार आमाकाे श्वासप्रश्वासमा मात्रै समस्या देखिएको छ । यसले गर्दा छातिमा संक्रमण देखिएको बताए ।

पहिलाकाे भन्दा स्वास्थ्यमा धेरै सुधार भएको छ, अब छातिको संक्रमण चहीँ देखिएको र औषधी चलाइरहेको चिकित्सकले बताएका छन् । मेयरको परिवारका ३ जनामै संक्रमण देखिएको थियो । छोरा भने अहिले होम आइसोलेसनमा बसेका छन ।