काठमाडाैं। नेकपा सचिवालयकाे बैठक १० दिन पर सरेकाे छ ।  प्रधानमन्त्री तथा नेकपा अध्यक्ष केपी शर्मा ओलीले प्रचण्डको लिखित दस्तावेजलाइ ‘काउन्टर’ दिने छुट्टै प्रस्ताव ल्याउने भएका छन् । आज बसेको बैठकमा ओलीले आफूले पनि प्रस्ताव ल्याउने बताएका हुन् ।

पार्टी प्रवक्ता नारायणकाजी श्रेष्ठका अनुसार ओलीले आगामी मंसिर १३ गते बस्ने बैठकमा आफ्नो प्रस्ताव पेश गर्ने तय भएको बताएका छन् । साे सचिवालय बैठकमा यसअघि नै प्रचण्डले पेश गरेको र ओलीले ल्याउने दुबै प्रस्तावमाथि छलफल हुने उनको भनाइ छ ।

यसअघिको बैठकमा अध्यक्ष प्रचण्डले प्रधानमन्त्री तथा अध्यक्ष ओलीको आलोचना गर्दै प्रस्ताव ल्याएका थिए भने सो प्रस्तावपछि नेकपामा विवाद चर्किएको थियो ।

प्रवक्ता श्रेष्ठका अनुसार पार्टीको संकट र निवारणको सम्बन्धमा सबै प्रस्ताव समेतको आधारमा छलफल गरेर निकास निकाल्ने प्रयत्न गरिने बताए । यस्तै उनले साे बैठकले आगामी १८ गते स्थायी समिति बैठक बस्ने र  १५ गतेका लागि तय भएको केन्द्रीय समिति बैठक भने २५ गते  सारिएको बताएका छन् ।