उर्लावारी । मोरङको उर्लाबारी नगरपालिकाले बारुण यन्त्र (दमकल) खरिद गर्ने  निर्णय गरेकाे छ । उर्लाबारी नगरपालिकाले दमकल खरिदका लागि आवश्यक टेण्डर प्रकृया अगाडी बढाएको जनाएको छ ।

अब चाडै नै उर्लाबारीबासीहरुले आगलागीका घटनामा तत्काल बारुण यन्त्रको सुविधा पाउने भएका छन् । नगरपालिकाले दमकलका लागि चाहिने आवश्यक जनशक्तिका परिपुर्ती गर्न विज्ञापन समेत आव्हान गरिसकेको छ ।

नगरपालिकाले दमकलका लागि सवारी चालक २ जना र अग्नि नियन्त्रक (फायर म्यान ) ४ जना गरी ६ जनालाई करारमा नियुक्ति गर्न विज्ञापन खुलाएकाे छ । विज्ञापनमा सवारी चालकका लागि न्यूनतम योग्यता ८ कक्षा पास र सवारी चालकको अनुमतिपत्र अनिवार्य भनिएको छ । सो पदका लागि नगरपालिकाले गत कार्तिक २८ गते नै विज्ञापन खुलाइ सकेकाे छ भने विज्ञापन खुलेको १५ दिन भित्र इच्छुक योग्यता पुगेका ब्याक्तिहरुले दरखास्त आव्हान गर्न सक्ने उलाबारी नगरपालिकाका प्रमुख खड्ग फागोले जानकारी दिएका छन् ।

नगरपालिकासंग आफनो बारुणयन्त्र नहुदाँ आगजनीका घटनामा नजिकको दमक र अन्य स्थानीय तहबाट दमकल मगाउनुपर्ने बाँध्यता रहदै आएको छ । लामो दुरीबाट दमकल आउनुपर्दा तत्काल अग्नि नियन्त्रण हुन नसक्दाँ जनधनको पनि बढिनै क्षति हुँदै आएको छ । अब भने अलिकति उर्लाबारीबासीहरूले राहतकाे महसुस गर्ने नगरप्रमुख फागाेले बताएका छन् ।