काठमाडौं । चिनियाँ रक्षामन्त्री वेइ फेङ्हे नेपाल एकदिने भ्रमणका लागि आइपुगेका छन् । केही समय अघि त्रिभुवन अन्तर्राष्ट्रिय विमानस्थलमा अवतरण गरेका छन् । २१ सदस्यीय प्रतिनिधिमण्डलको चिनियाँ विशिष्ट पाहुना नेतृत्व गर्दै विशेष विमानबाट रक्षामन्त्री काठमाडौँ अवतरण गरेका हुन् ।

केही घण्टाका लागि नेपाल आएका उनले उच्चस्तरीय राजनीतिक भेटवार्ता गर्नेछन् । त्यसपछि आजै काठमाडौंबाट फिर्ता हुनेछन् ।

भारतीय विदेश सचिव नेपाल भ्रमण गरी फर्किएलगत्तै हुन लागेको चिनियाँ रक्षामन्त्रीको आगमनलाई विश्लेषकहरूले अर्थपूर्ण मानेका छन् ।

विमानस्थलबाट सिधै बालुटारस्थित चिनियाँ दूतावासमा जाने त्यहाँ केहीबेर आराम गरेपछि उनी औपचारिक भेटवार्ताका लागि निस्किने कार्यक्रमकाे तालिका रहेकाे छ ।

पहिले उनले प्रधानसेनापति पूर्णचन्द्र थापासँग भेट्ने छन् र दिउँसो दुई बजे जंगीअड्डामा नेपाली सेनाको टोलीले चिनियाँ रक्षामन्त्री फेङ्हीलाई सम्मानगारथ अर्पण गर्ने छ । त्यसपछि उनले प्रधानसेनापति थापालाई शिष्टाचार कल (अफिस कल) गर्ने छन् ।

त्यसपछि चिनियाँ रक्षामन्त्रीकाे टोली र प्रधानसेनापति थापासहितको नेपाली सेनाको टोलीबीच द्विपक्षीय वार्ता हुनेछ ।

जंगीअड्डापछि उनी प्रधानमन्त्री केपी शर्मा ओलीलाई भेट्न प्रधानमन्त्री निवास बालुवाटार पुग्ने छन् । बालुवाटारपछि उनी राष्ट्रपति विद्यादेवी भण्डारीलाई भेट्न शितल निवास जाने छन् ।

शितल निवासमा राष्ट्रपतिलाई भेटेपछि उनी सिधै त्रिभुवन अन्तर्राष्ट्रिय विमानस्थल प्रस्थान गरि आजै स्वदेश फर्कने कार्यक्रम रहेकाे छ ।