काठमाडौं। एक बर्ष पछि नेपाली क्रिकेट टिमले नयाँ प्रशिक्षक पाएको छ । नेपाल क्रिकेट संघ (क्यान)ले मुख्य प्रशिक्षकको रुपमा अष्ट्रेलियाका पूर्व ब्याट्सम्यान ह्वाटमोरको नाम अन्तर्राष्ट्रिय क्रिकेट परिषद् (आइसीसी) सिफारिस गरि पठाएकोमा आज एक विज्ञप्ति जारी गर्दै क्यानले ह्वाटमोरको नियुक्ति गरिएको पुष्टि गरेको छ ।

पूर्व श्रीलंकन राष्ट्रिय खेलाडी ह्वाटमोरको सम्झौता पहिलो चरणमा एक वर्षको हुनेछ । उनले पारिश्रमिक स्वरुप कम्तिमा १० हजार भन्दा बढी अमेरिकी डलर पारिश्रमिक पाउने छन् ।

६६ बर्षीय ह्वाटमोरको उमेरमा आइसीसीलाई कुनै आपत्ति नरहेको साथै सम्झौता अवधिमा पनि आइसीसीले कुनै चासो राखेको छैन ।

नेपाली क्रिकेट टोलीको पछिल्लो खेल स्तर खस्किदो अवस्थामा रहेको छ भने ब्याटिङ् तर्फ पुरानै समस्या छ । त्यसलाई मध्यनजर गर्दै ब्याटमा सुधार ल्याउन पनि क्यानले वाटमोरलाई ल्याउने सोचमा पुगेको बुझिएको छ । सम्झौता १ बर्षको हुने त्यसपछि टोलीमा उनको प्रभाव देखिए सम्झौता थपिन सक्ने बताइएको छ ।

नेपाली टिमको मुख्य प्रशिक्षक बन्नका लागि ७२ जनाले नाम आवेदन दिएका थिए भने सर्ट लिस्टमा १५ जनाको नाम सिफारिस भएपछि अन्तरवार्तामा बोलाएको थियो तर १२ जना मात्र अन्तरवार्तामा उपस्थित थिए । नेपाली क्रिकेट झण्डै एकवर्ष देखि विदेशी प्रशिक्षक विहिन रहेको छ ।

हाल राष्ट्रिय खेलकुद परिषद् (राखेप)का मुख्य प्रशिक्षक जगत टमटाले सम्हाल्दै आएका छन् । नेपाली क्रिकेट टोली हाल कीर्तिपूर टियू मैदानमा बन्द प्रशिक्षणमा छ । नेपालले आगमी मार्चमा ओमानमा आइसिसी विश्वकप लिग–२ अन्तर्गत एक दिवसिय त्रिकोणात्मक सिरिज खेल्ने सम्भावना रहेको छ ।