दमक। झापाको शिवसताक्षी वडा नं. ७ र ८ को संयुक्त रुपमा युमा साम्यो महासभा नेपालको एक तदर्थ वडा समिति गठन भएको छ । झिलझिले सिर्जना चौकमा तुतु तुम्याहाङ् भगिश्वर मेन्याङ्बोको प्रमुख आतिथ्यतामा युमा साम्यो महासभाको तदर्थ समिति गठन भएको हो ।

याक्थुङ लिम्बु जातिको परम्परागत प्राचिन मुन्धुमी मौलिक पहिचान, संस्कार, संस्कृति, परम्परा, चालचलन आप्लुङ ताङ्सेप (संरक्षण) गर्नका लागि युमा साम्यो महासभा नेपाल शिवसताक्षी वडा ७ र ८ को समितिमा अम्बिका मेन्याङ्बोको अध्यक्षतामा एक संयुक्त तदर्थ समिति गठन गरिएको छ । त्यसैगरी साे सिमितकाे उपाध्यक्ष हर्क इजम, सचिव विरुहाङ मेन्याङ्बो, सह–सचिव पदम इजम, कोषाध्यक्ष आइत मेन्याङ्बो, सह–कोषाध्यक्ष मनु नाल्बो छन् । सदस्यहरुमा क्रमशः विजय इजम, हर्कबहादुर चङ्सु, मनोज साम्सुहाङ, कल्पना मेन्याङ्बो, सागर मेन्याङ्बो, मबिन इजम र बिसन साम्सुहाङ चयन भएका छन् ।

साथै सो कार्यक्रमले सल्लाहकार (तुम्याहाङ)को संयोजकमा भगिश्वर मेन्याङ्बो, सदस्यहरुमा शिवकुमार मेन्याङ्बो, होम इजम, छत्रबहादुर पालुङ्वा र सुकबहादुर इजम चयन गरेका छन् । समितिको संरक्षकमा दिलसिंह मेन्याङबो (हाल युके) रहनु भएको छ ।

उक्त कार्यक्रममा अतिथि एवं वक्ताका रूपमा युमा साम्यो महासभा नेपालका केन्द्रीय प्रतिनिधिहरूः भीमसेन लिङदम, आइत खजुम, योबाहाङ तुम्बाहाङ्फे, सुनसरी जिल्ला अध्यक्ष नेत्रप्रसाद सौदेन, मेन्याङ्बो कल्याण संघका अध्यक्ष दिपक मेन्याङ्बो, युमा साम्यो झापा जिल्ला अध्यक्ष टेकबहादुर योङहाङ, याक्थुङ भाषाप्रेमी एवं समाजसेवी अशोक नेम्बाङ, मुन्धुम अध्येता जितेन्द्रराज चेम्जोङ, स्थानीय जनप्रतिनिधिद्वयः वडा नं. ७ का वडाध्यक्ष जीवन इजम र वडा नं. ८ का वडाध्यक्ष केहरसिंह बस्नेत रहेका थिए ।

युमा साम्यो शिवसताक्षी नगर समितिका अध्यक्ष सुरज लक्समको सभापतित्वमा भएको उक्त कार्यक्रम युमा धर्म सम्बन्धी गीतहरूमा स्थानीय कलाकारहरूद्वारा तयार पारिएका नृत्यहरू र येबाहरूद्वारा येबालाङ प्रस्तुत गरिएका थिए ।