काठमाडौं। शेयर बजारको परिसूचक २५ अंकले बढेसँगै यो बर्षकै उच्च विन्दुमा पुगेको छ । आज सो अंकको वृद्धिपछि नेप्से २ हजार ८७ अंकमा पुगेको छ ।

कारोबार बन्द गर्ने समयसम्ममा कारोबार भएको हुँदा यो अंक अहिलेसम्मकै उच्च हो । केही दिन अघि मात्र नेप्सेले २ हजार ७९ अंकको उच्च रेकर्ड बनाएको थियो ।

आज ५ अर्ब ७० करोड रुपैयाँको सेयर कारोबार भएको छ । अघिल्लो दिन ४ अर्ब ४४ करोडको कारोबार भएको थियो । नेप्से बढ्नुमा बैंकिङ समूहको नै मुख्य भूमिका रह्यो । बैंक समूह ३० अंकले बढेको छ ।

त्यस्तै ब्यापार समूह १८७, होटल १, विकास बैंक १४, जलविद्युत ४, फाइनान्स ४, उत्पादन २, अन्य २३, जीवन बीमा समूह १७२ अंकले बढेका छन् । माइक्रोफाइनान्स समूह १ अंकमुनि हरियो रह्यो भने निर्जीवन बीमा समूह ९६ अंकले घटेको छ ।

आज साल्ट ट्रेडिङ कर्पोरेसनका लगानीकर्ताले सबैभन्दा धेरै १० प्रतिशत मूल्य कमाएका छन् । त्यस्तै एभरेष्ट बैंकको मूल्य ६.६ प्रतिशतले बढेको छ भने नारायणी डेभलपमेन्ट बैंकको मूल्य सबैभन्दा धेरै ३.७ प्रतिशतले घटेको छ ।