चुलाचुली। इलामको चुलाचुली गाँउपालिकाले फूटबल र सितोरियो कराते खेलका लागि आवश्यक सामाग्री हस्तान्तरण गरेका छन् । आज एक कार्यक्रमका बिच गाउँपालिकाका प्रमुख प्रदिपचन्द्र राईद्वारा फूटबलका प्रशिक्षक कुमार गिरी र कराँतेका क्रमिक राई, चन्द्र राई, भिम लावती र मनकुमार लिम्बुलाई खेल सामाग्री हस्तान्तरण गरिएको छ ।

आ. ब. २०७७/०७८ को खेलकुद शिर्षक अन्तर्गत फूटबल र कराँतेको लागि ६ वटै वडाका युबा खेलाडीहरूलाई खेल क्षमतामा थप वृद्धि गर्ने उद्देश्यका साथ ३/३ स्थानमा प्रशिक्षण कार्यक्रम गर्न आवश्यक सामानहरु प्रदान गरेको गाउँपालिकाले जनाएको छ । सामान हस्तान्तरण कार्यक्रममा चुलाचुली ५का वडा अध्यक्ष चन्द्र कुमार थापा, ३का अध्यक्ष नरेन्द्र लावती, १ का कार्यबहाक अध्यक्ष सीता लावती र गाउँपालिकाका सामाजिक विकास समिति संयोजक राम प्रसाद राईको पनि उपस्थिति रहेको थियो ।

आजै प्रशिक्षण कार्यक्रमको शुभारम्भ गरिएको जनाइएको छ । फूटबलका लागि वडा नं १, २, ३ र४ को लागि श्री पञ्चकन्या आ. वि. को खेल मैदान त्यसैगरी ५ र ६ को तल्लो भागका लागि चपेटी खेल मैदान र ६ को माथिल्लो भागको लागि साकफारा खेलमैदानमा प्रशिक्षण गरिने जनाइएको छ ।

कराँतेको लागि श्री शिव ज्योति आ. वि. चुलाचुली १को मैदान, किराँतेश्वर मावि चुलाचुली ३ र चपेटै खेल मैदान चुलाचुली ५ गरी तीन स्थानमा प्रशिक्षण गरिने गाउँपालिका अध्यक्ष राईका स्वकिय सचिव सञ्जय राईले जानकारी दिएका छन् ।

(तस्वीर सन्जय राइकाे फेसबुकबाट)