लिम्बुवानखबर। झापाको कनकाईका क्रियाशिल सामाजिक संघसंस्थाहरुले अल्ट्रा म्याराथुन धावक विश्व च्याम्पियन मिरा राईलाई सुरुङ्गामा सम्मान गरेका छन् ।

कनकाई खेलकुद प्रतिष्ठानको आयोजनामा सम्पन्न सम्मान कार्यक्रममा प्रतिष्ठानसहित कनकाई नगर खेलकुद विकास समिति, रोटरी क्लव अफ सुरुङ्गा, लायन्स क्लव अफ कनकाई सुरुङ्गा, सुरुङ्गा जेसीज, कनकाई भ्याट्रन क्लव, मदन भण्डारी स्पोर्टस एकाडेमी लगायत विभिन्न संघसंस्थाहरुले दोसल्ला ओढाएर सम्मान पत्र सहित विशेष सम्मान गरेका हुन् ।

भोजपुरको दुम्मा ५ मा बुबा सुकबहादुर र आमा मम्फारानी राईकी छोरीको रुपमा मिरा राईको जन्म भएको हो । उनी सानै उमेरदेखि नै खेलकुदका क्षेत्रमा रुची राख्ने राईले अल्ट्रा दौड शुरु गरेको २ वर्षमै सफलताको शिखरमा पुगेकी हुन् । हङकङ, अष्ट्रेलिया, फ्रान्स, नर्बे, स्विट्जरल्याण्ड, ईटाली लगायतका देशहरुमा अल्ट्रा दौडमा भाग लिएर विश्व चेम्पियन बनिसकेकी छन् ।

कार्यक्रममा सम्बोधन गर्र्दै विश्व विजेता राईले विश्वकै उकालो ओरालोमा गरिने यो दौडबाट आफ्नो प्रतिभा देखाउँने अवसर प्राप्त भएकोमा आँफैलाई गौरव लागेको बताइन् । उनले खेलाडीलाई प्रत्यक्ष रुपमा सहयोग पुग्ने गरीको कार्यक्रम ल्याउँन सरकारलाई अपिल समेत गरेकी छन् ।

कनकाई खेलकुद प्रतिष्ठानका अध्यक्ष दिननाथ खतिवडाको सभापतित्वमा भएको कार्यक्रममा प्रमुख अतिथि १ नं प्रदेश सभा सदस्य हिराकुमार थापा, कनकाई नगरपालिकाका प्रमुख राजेन्द्र पोखरेल, उपप्रमुख मन्जु प्रसाईँ लगायतले दोसल्ला ओढाएर सम्मानपत्र सहित धावक राईलाई सम्मान गरिएको प्रतिष्ठानका सचिव विनोद रानामगरले बताए ।

सम्मान कार्यक्रममा कनकाई उद्योग वाणिज्य संघका निवर्तमान अध्यक्ष कुमारमणि पोखरेल, सुरुङ्गा खानेपानी संस्थाका अध्यक्ष भीमप्रसाद अधिकारी लगायतले देशका यस्ता प्रतिभालाई सरकारका तर्फबाट महत्वका साथ हौसला प्रदान गर्नु पर्नेमा जोड दिएका छन् ।

अनमिनबाट माओवादी सेनाको अयोग्य लडाकुमा परेपछि राई सुरुङ्गामै आफन्तको घरमा बसी लामो समय कनकाई माविको खेल मैदानमै अभ्यास समेत गरेकी थिएन । माओवादी जन सेनामा उमेरका कारण अनमिनले भर्ना नलिएकी राई विश्व च्याम्पियान बन्न पुगिन ।