लिम्बुवानखबर,२८ असोज । झापाको विर्तामोडमा सञ्चालित भूतपूर्व सैनिक गोल्डकपको उपाधि आयोजक बिर्तामोड भारतीय गोर्खा भूतपूर्व सैनिक संघले जितेको छ । दुधेको भूतपूर्व सैनिक संघलाई हराउँदै आयोजक भूपू सैनिक संघ विर्तामोडले उपाधि आफ्नै पोल्टामा हात पारेको हो ।

बुधबार भएको फाइनल खेलमा दुधेको माङमारी टिमलाई ३–० गोल अन्तरले पराजित गर्दै आयोजक टिम च्याम्पियन बनेको हो ।

प्रतियोगिताका विजेताले रु एक लाख ११ हजार १११, ट्रफी र मेडल हात पारेको छ भने उपविजेता टिमले रु ६१ हजार १११, ट्रफी र मेडलमा चित्त बुझाएको छ । खेलमा ६० वर्षभन्दा माथिका उच्च गोलकर्ता आयोजकका क्याप्टेन डिके गुरुङले नगद २५ हजार प्राप्त गरेका थिए ।

त्यस्तै, प्रतियोगिताका बेस्ट डिफन्स दुधेका बुरा राई, मिडफिल्ड आयोजकका शेरबहादुर गुरुङ, फवर्ड आयोजककै तोयाप्रसाद भूजेल र गोलकिप्पर विजेता टिमका शिवकुमार गुरुङ घोषित भए । उनीहरुले जनही पाँच हजार हात पारेका छन् ।

विजेता तथा उपविजेतालगायतलाई झापा ११ फूटबल क्लवका अध्यक्ष जलकुमार गुरुङले नगद तथा ट्रफी प्रदान गरेका छन् । प्रतियोगिता बिर्ताबजारस्थित डोमालाल राजवंशी रंगशालामा भएको थियो । भूतपूर्व सैनिकहरुबीच एकता तथा सुमधुर सम्बन्ध बनाउने उद्देश्यले बडादसैँको अवसर पारेर मैत्रीपूर्ण प्रतियोगिताको आयोजना गरिएको आयोजकका अध्यक्ष डिके गुरुङले बताए ।