काठमाडौं, १२ कार्तिक । नेपालको शीर्ष श्रेणीको फुटबल लिग शहीद स्मारक ए डिभिजन लिगको खेल तालिका सार्वजनिक भएको छ । आज अखिल नेपाल फुटबल संघ (एन्फा) अन्तर्गतको लिग कमिटीले सार्वजनिक गरेको हो । आज लिग खेल्ने ए डिभिजनका १४ क्लबका प्रतिनिधिको उपस्थितिमा टाइ सिट ड्र गरिएको एन्फाले जनाएको छ ।

टाइसिट ड्र अनुसार कात्तिक २९ गतेको उदघाटन खेलमा फ्रेण्ड्स क्लब र सातदोबाटो युथ क्लब भिड्ने भएका छन् । करिब चार महिना चल्ने लिगको उद्घाटन खेल फ्लड लाइटमा खेलाइने आयोजकले बताएको छ । खेल बेलुका ५ बजे दशरथ रंगशालामा हुनेछ ।

यसपटक च्यासल खेल मैदान पनि लिगका लागि प्रयोग गरिने आयोजकले जनाएको छ । लिगमा कुल १३ राउण्डमा ९१ खेल हुनेछ । पुस अन्तिममा ९ राउण्डसम्मको खेल सकाउन बताइएको छ ।

लिग फागुन १४ गतेसम्म चल्नेछ । पहिलो दुई राउण्डको समय र खेल स्थान पनि सार्वजनिक गरिएको छ । पहिलो दिन एक खेल मात्र हुनेछ । त्यसपछि दैनिक दुई खेल हुनेछ । जसमा पहिलो खेल १२ बजे र दोस्रो खेल ३ बजे शुरु हुनेछ ।

यस्तै दोस्रो राउण्डमा एकै दिन ३ खेलसम्म खेलाउने तालिका छ । जसमा दुई खेल एकै समयमा राखिएको आयोजकले जनाएको छ ।

ए डिभिजन लिग खेल्ने १४ क्लबहरु निम्न छन्ः

मछिन्द्र फुटबल क्लब
त्रिभुवन आर्मी फुटबल क्लब
मनाङ मर्स्याङ्दी क्लब
थ्री स्टार क्लब
नेपाल पुलिस क्लब
सशस्त्र एपीएफ
च्यासल युथ क्लब
संकटा क्लब
हिमालयन शेर्पा क्लब
एनआरटी क्लब
जावलाखेल युथ क्लब
फ्रेण्ड्स क्लब
सातदोबाटो युथ क्लब
ब्रिगेड ब्वाइज क्लब