सुर्खेत।संघीय लोकतान्त्रिक राष्ट्रिय मञ्चको मेचीकाली अभियान टोली सुर्खेतमा पुगेको जनाएको छ । मञ्चका संघीय अध्यक्ष कुमार लिङ्देनले आज सामाजिक सञ्जालमा सुर्खेतमा दुई दिने कार्यक्रममा सरिक हुन त्यहाँ पुगेको उल्लेख गरेका छन् ।

पुष १७ र १८ गते सुर्खेतमा दुई दिने प्रशिक्षण एवंम अन्तरक्रिया कार्यक्रम गरिने जनाइको छ । मञ्चका संघीय अध्यक्षले सामाजिक सञ्जालमा प्रदेश ६ सुर्खेतमा रहेका खस जातीका अगुवा व्यक्तित्वहरुसँग मञ्चको राजनैतिक एजेण्डामा छलफल हुने बताएका छन् ।

मञ्चले पछिल्लो समयमा १०+१ प्रान्तीय अवधारणा अनुसार सबै प्रान्तमा पुग्ने र आफ्नो पार्टीको राजनैतिक एजेण्डा बारे छलफल बहस गर्ने जनाइएको छ । उक्त अभियानले राष्ट्रिय राजनीतिमा मञ्चको दर्विलो उपस्थिति रहने सुर्खेत पुगेको कार्यदलका संघीय अर्थ संयोजक विष्णु यक्सोको जिकीर रहेको छ ।

उक्त संघीय अभियान टोलीमा मञ्चका संघीय सचिव शान्ता योङहाङ, इन्दीरा मेन्याङ्बो, अर्थसचिव दिपा लिम्बु, संघीय सदस्य चन्द्र कन्दङ्वा, सुर्य लिम्बु, दलित शिल्पी मञ्चका महासचिव शर्मिला वाघचन्द लगायतका नेताहरु रहेका छन् ।