काठमाडौं। चीनको वुहान शहरबाट शुरु भएको कोरोना संक्रमण अझै पनि नियन्त्रण भएको छैन । विभिन्न देशहरुले कोरोना खोप बनाएर परिक्षण गरिरहेको छ तर नेपालमा कहिल्यैबाट कोरोना खोप लगाउन थाल्ने हो सरकार अझै पनि मौन रहेको छ ।

कोरोना संक्रमणको उच्च जोखिममा रहेको नेपाल अहिले कोरोना संक्रमणको ४१औं नम्बरमा रहेको छ । विश्वमा कोरोना संक्रमितको संख्या ८ करोड ७७ लाख ८३ हजार ३३३ पुगेको छ भने पहिलो स्थानमा रहेको अमेरिकामा संक्रमितको संख्या २ करोड १८ लाख ५७ हजार ६१६ पुगेको तथ्याङ्कले देखाएको छ । अमेरिका हालसम्म पनि पहिलो स्थानमा यथावत रहेको छ ।

नेपालमा कोरोना संक्रमितको कुल संख्या २ लाख ६३ हजार ६०५ पुगेको छ । पछिल्लो २४ घण्टामा थप ४१२ जना कोरोना संक्रमित थपिए संगै कुल संख्या २ लाख ६३ हजार ६०५ पुगेको स्वास्थ्य तथा जनसंख्या मन्त्रालयले जनाएको छ । संक्रमित हुनेमा १८२ महिला र २३० पुरुष रहेका छन् ।

त्यसैगरी पछिल्लो २४ घण्टामा ५ हजार १३२ पीसीआर परीक्षण भएको छ । नेपालमा हालसम्म १९ लाख ६९ हजार २९२ पीसीआर परीक्षण भएको छ । सक्रिय संक्रमितको संख्या ५ हजार ५८ छ भने क्वारेन्टाइनमा ३४२ जना रहेको मन्त्रालयको तथ्याङ्का रहेको छ ।

४८३ जना निको भइ डिस्चार्ज भईरहँदा कोरोनाबाट निको हुनेको संख्या २ लाख ५६ हजार ६४४ पुगेको छ ।

त्यसैगरी पछिल्लो २४ घण्टामा कोरोनाबाट ४ को मृत्यु भएको छ भने हालसम्म कोरोनाबाट ज्यान गुमाउनेको संख्या १ हजार ९०३ पुगेको स्वास्थ्य तथा जनसंख्या मन्त्रालयले जनाएको छ ।