काठमाडौ। प्रदेश नं. १ का मुख्यमन्त्री शेरधन राई विवाह बन्धनमा बाँधिदैछन् । सन् २०१८ की ‘मिस मंगोल नेपाल’ ज्याङ्मु शेर्पासँग विवाह गर्न लागेका मुख्यमन्त्री राईले आइतबार अर्थात ११ माघमा काठमाडौंको नक्सालस्थित एलिस रिसेप्शनमा भोज दिँदैछन् ।

विवाह समारोहमा आफन्तजन, राजनीतिकर्मी, कर्मचारी र केही कुटनीतिज्ञहरुलाई मात्र निमन्त्रणा गरिएको बताइएको छ । समारोहमा निम्तालुलाई आइतबार दिउँसो ३ बजेपछि निमन्त्रणा गरिएको छ । मुख्यमन्त्री विवाह समारोहको तयारी गर्नका लागि काठमाडौं आइसकेको र विवाह समारोहका लागि सम्पूर्ण तयारी भइसकेको स्रोतले बताएको छ ।

मुख्यमन्त्री राई र ज्याङ्मुको विवाह समारोहमा पाँच सयको हाराकारीमा निम्तो बाँडिएको बताइएको छ । त्यसमध्ये केही पत्रकारसमेत परेका छन् ।

भोजपुरका मुख्यमन्त्री राई र संखुवासभाकी ज्याङ्मुबीच प्रेम विवाह हुन लागेको हो । ‘मिस मंगोल नेपाल’को ताज पहिरिएसँग समाजसेवामा सक्रिय ज्याङ्मु र मुख्यमन्त्री राई समाजसेवाकै सिलसिलामा नजिक भएको बताइन्छ ।

विवाह पार्टी हुने स्थानलाई सजाउने काम तीव्र चलिरहेको छ । दुलहा–दुलही बस्ने ठाउँदेखि पाहुना रहने ठाउँहरु चिरिच्याट्ट बनाइएको स्रोतले जनाएको छ ।

(दृष्टिन्यूजबाट)