काठमाडौं। निर्वाचन आयोगले सत्तारुढ नेपाल कम्युनिष्ट पार्टी (नेकपा)का दुबै समूहमा विभाजन भएको निर्णयलाई मान्यता नदिने भएको छ । आइतबार बसेको आयोगको बैठकले दुबैको दाबी नपुगेको निष्कर्ष निकालेको हो ।

‘प्रचण्ड–माधव पक्ष र ओली पक्षले आफू खुशी गरेको निर्णयलाई आयोगले मान्यता दिन नमिल्ने –एक आयुक्त भन्छन् ।’ दुबै पक्षले विवरण संशोधन गर्न गरेको दावीविरोध विधान सम्मत नभएको वताए ।

संसद विघटन लगतै प्रचण्ड–माधव पक्षले केपी शर्मा ओलीलाई पार्टी अध्यक्षबाट हटाएर माधवकुमार नेपाललाई अध्यक्ष बनाउने निर्णय गरेको छ ।

उता ओली पक्षले भने केन्द्रीय कमिटी विस्तार गरेको छ । दुबै पक्षले त्यही विवरणलाई बैधानिकता दिन निर्वाचन आयोगलाई आग्रह गरेका थिए । तर आयोगले दुबैको दाबी नपुगेको ठहर गरेको छ ।

कानूनी रुपमा नेकपा विभाजन नभएको नै मानिनेछ । त्यसैगरी अध्यक्षद्धय केपी शर्मा ओली र पुष्पकमल दाहाल प्रचण्ड नै हुनेछन् भने केन्द्रीय कमिटी पनि दल दर्ता गर्दा कायम रहेको मात्र रहने आयोगले जनाएको छ ।