दमक, २९ पुष । संघीय लिम्बुवान प्रान्तीय मञ्चको झापाको दमक र मोरङको लेटाङमा एकदिन नगरस्तरीय नेताहरुलाई राजनैतिक प्रशिक्षण दिइएको छ । दमकमा मञ्चका प्रान्तीय उपमहासचिव धनराज सुब्बा र सचिव मोहन बेघा नाम्साले प्रशिक्षण दिएका छन् ।
यसरी नै लेटाङ नगर समितिको आयोजनामा आयोजित एकदिने प्रशिक्षण कार्यक्रममा मञ्चका संघीय सह–सचिव चौकीदार तामाङ्ले नगर स्तरका नेताहरुलाई पार्टीको कार्यदिशा र अवधारणा बारे प्रशिक्षण दिएका छन् ।
नेतृत्व विकास बारे मुख्य लक्ष्यका साथ लिम्बुवानले नौ वटै जिल्लाहरुमा प्रशिक्षण र सिसिओ अभियान संचालन गर्ने तयारी गरिरहेका अवस्थामा बिहीबार देखि जिल्लाका स्थानीय तहहरुले प्रशिक्षण कार्यक्रमहरु शुरु गरेको हो ।
दमकमा नगरका सबै नेताहरु र वडाध्यक्षहरुलाई प्रशिक्षणमा सहभागी गराएको नगर अध्यक्ष याम लिम्बुले बताए । प्रशिक्षणले नेताहरुमा थप नेतृत्व विकास गर्ने क्षमता अभिवृद्धि हुने हेतुले यस्तो कार्यक्रम अपरिहार्य रहेको उनले बताए । कार्यक्रममा नगर समिति र वार्डका पचास नेताहरुले राजनैतिक प्रशिक्षण लिएको उनले बताए ।
यसरी नै लेटाङको प्रशिक्षणमा प्रान्तीय सचिवालय सदस्य ललित सुब्बा (फक्ताङलुङफोब्बा) र जिल्ला अध्यक्ष जिवन खेवाले समेत सहजीकरण गरेका छन् । कार्यक्रममा नगरका ३५ जना नेताहरुले प्रशिक्षण लिएका छन् ।
Related