प्रदेश नंं. २ काे प्रदेश सभा भवन
लिम्बुवानखबर, ३ माघ । नेपालको इतिहासमा लामो आन्दोलनको जगमा उभिएको प्रदेश २ को नाम मधेस नामकरण भएको छ । सोमबार बसेको प्रदेश सभा बैठकले प्रदेश सभाको नाम मधेस प्रदेश राख्ने प्रस्ताव दुई तिहाइ बहुमतले पास गरेको हो ।
सोमबार बसेको दोस्रो बैठकमा ९९ सांसद सहभागी भएका थिए, सो बैठकमा भएको मतदान अनुसार ८० जनाले मधेसको पक्षमा मत दिएका थिए ।
सरकारको नेतृत्व गरिरहेको जनता समाजवादी पार्टी (जसपा)सँगै सत्तारुढ माओवादी केन्द्र र विपक्षी लोकतान्त्रिक समाजवादी पार्टी (लोसपा)ले संयुक्त रुपमा प्रदेशको नाम मधेश प्रस्ताव गरेका थिए ।
जसपाको ३९, माओवादीका ८ र लोसपाको १६ गरी ६३ जना सांसद र १ सांसद रहेको नेपाल संघीय समाजवादी पार्टीले पनि यसमा समर्थन जनाएको थियो । त्यसैगरी अन्य दलका १६ सांसदले पनि प्रदेशको नाम मधेस राख्ने प्रस्तावको पक्षमा मतदान गरेका छन् ।
मधेश नाम स्वीकृत भएपछि अब अन्य नाम स्वतः निष्क्रिय भएको सभामुख सरोजकुमार यादवले जनाएका छन् । ७ प्रदेश मध्ये प्रदेश २ र १ को मात्र नामकरण हुन बाँकी रहेको बेला पहिचानको आधारमा पहिलो प्रदेश नामकरण हुन सफल भएकोमा मधेस प्रदेशको पक्षमा मतदान गर्नुहुने सम्पूर्णमा पहिचान पक्षधरहरुले धन्यवाद ज्ञापन गरेका छन् ।
अन्य नामहरुमा कांग्रेसले ‘मिथिला भोजपुरा’, नेकपा एकीकृत समाजवादी र नेकपा एमालेले ‘जानकी’ तथा कांग्रेसकै सांसद राजेश्वर साहले ‘मध्य मधेस’ नाम प्रस्ताव गरेका थिए । ति सबै नामहरु स्वगत निष्किृय भएका छन् ।
यसअघि ३ चैत २०७६ मा मतदान भए पनि प्रदेशको नामकरण हुन सकेको थिएन । दोस्रो पटक नामकरण राख्न प्रदेश नं. २ सफल भएको छ । अब प्रदेश नं. १ को मात्र नामकरण हुन बाँकी रहेको छ । यस अघि नै अन्य पाँच वटा प्रदेशहरुको नामकरण भईसकेको छ ।
मधेसकाे राजधानी जनकपुर
सोमबार नै प्रदेश सभाले स्थायी राजधानी जनकपुर टुंगो लगाएको छ । पहिलो बैठकमा भएको मतदानमा ७८ जनाले जनकपुरको पक्षमा मत दिएका थिए ।
प्रदेश २ को राजधानी तथा नामकरण सम्बन्धी अध्ययन विशेष समितिले स्थायी राजधानीका लागि शुरुमा ७ वटा प्रस्ताव गरेको थियो । पछि त्यसलाई परिमार्जन गरी तीन वटा बनाएको थियो त्यसमध्ये जनकपुरलाई दुई तिहाइ बहुमत मतले पारित गरेको हो ।
Related