काठमाडौं, ८ माघ । आज तामाङ् समुदायले मनाउने २८५९ सोनाम ल्होछार देशविदेशमा विविध कार्यक्रम गरि मनाइँदैछ ।

तामाङ समुदायले नयाँ वर्षको रुपमा माघ शुक्ल प्रतिपदाका दिन मनाउने पर्व सोनाम ल्होछार विविध कार्यक्रम गरि मनाउन लागिएको हो ।

आज यो पर्वको अवसरमा काठमाडौंको टुँडिखेलमा नेपाल तामाङ घेदुङ संघले बृहत तामाङ सांस्कृतिक महोत्सवको आयोजना गरि यो कार्यक्रम गर्दैछ । सो महोत्सवको प्रधानमन्त्री पुष्पकमल दाहाल प्रचण्डले दिउँसो १ बजे उदघाटन गर्ने कार्यक्रम रहेको घेदुङ्ले जनाएको छ ।

तामाङ्सालिङ् क्षेत्रमा विशेष गरि मनाइने यो पर्व मुलुकका विभिन्न भागमा छरिएर बसोबास गर्ने तामाङसहित ह्योल्मो, थकाली, जिरेल, नेस्याङ्वा, भोटे, दुरा, लेप्चा आदि जातिले समेत आ–आफ्नै शैली र परम्पराअनुसार यो पर्व मनाउँदै आएको पाइन्छ । तामाङ जाति देशको सबै प्रदेशमा छरिएर रहेता पनि बागमती प्रदेशमा बढी रहेको हुँदा यो पर्व विशेषरुपमा मनाइन्छ ।

यस वर्षको पर्वमा सरकारले सार्वजनिक बिदा दिने गरेको छ ।