ललितपुर, १८ पौष । टिभी कार्यक्रम ‘इन्द्रेणी’मा गीत गाएर चर्चित बनेका बाल गायक सचिन परिवारको असामयिक निधन भएको छ । बिहीबार आज उनको उपचारको क्रममा विहान १०ः४५ बजे काठमाडौंस्थित त्रिवि शिक्षण अस्पतालमा निधन भएको हो ।

१३ वर्षीय गायक सचिनको केही दिनदेखि आईसीयूमा उपचार भइरहेको थियो । अघिल्लो वर्षदेखि नै स्वास्थ्यमा समस्याका कारण थलिएका उनको कम्मरमुनिको भाग राम्रोसँग चल्दैन थियो । यसअघि शल्यक्रिया गरेर तंग्रिएका सचिन आफ्नै बलमा उभिन नसक्ने अवस्थामा थिए ।
सामाजिक संजालहरुमा भाइरल बालगायकका रुपमा परिचित सचिनले गाएका गीत सामाजिक सञ्जालमा यतिवेला छाएका छन् ।

सचिनले महानायक राजेश हमालसँगसमेत एक म्युजिक भिडियोमा अभिनय गरेका थिए । यसैगरी नेपाल टेलिभिजनबाट प्रशारित चर्चित हास्य श्रृंखला ‘मेरी बास्सै’मा पनि अभिनय गरेका थिए ।

‘रातो रबर एक’, ‘रुमाल खस्छ कि’, ‘के छ र हजुर’, ‘बरको छायाले’ लगायत उनका धेरै गीतहरु चर्चित भएका छन् ।

बाल गायक सचिनको निधनले यतिवेला सामाजिक संजाल भरिभराउ भएको छ ।