दमक, २१ पौष । धिमाल जातीय विकास केन्द्र, केन्द्रीय समितिको आयोजनामा पाँचौं चिचिरी, गेन्द्रो दिवस मनाइने भएको छ । धिमाल जातिको मौलिक खाना, संस्कतिको प्रचारप्रसार र प्रवर्धन गर्न मोरङको उर्लाबारीमा चिचिरी, गेन्द्रो दिवस–२०८१ माघ १२ गते शनिबारका दिन मनाउने निर्णय भएको हो ।
धिमाल जातिको लोपोन्मुख सँस्कृति, कला, मौलिकता र स्वास्थ्य खानाका परिकारहरुलाई प्रबद्र्धन गर्न यो दिवस हरेक वर्ष मनाउने गरेको धिमाल जातिय विकास केन्द्रका महासचिव मातृका धिमालले बताउनु भयो ।
धिमाल परिकार स्टलमा धिमाल जातिको मौलिक खानाहरु चिचिरी, गेन्द्रो, तोले, चुदुर, पायाको बिहा, गोरा, हाया लगायतका परिकारहरु पाईने उनले बताए । सो अवसरमा विभिन्न राष्ट्रिय तथा धिमाल जातिका राष्ट्रिय तथा स्थानीय कलाकारहरुको उपस्थितिमा साँस्कृतिक तथा सांगीतिक कार्यक्रम पनि हुने उनले बताए ।
यस अघि झापाको दमकमा पहिलो संस्करण, मोरङको उर्लाबारी मङलबारेमा दोस्रो संस्करण र मोरङको बेलबारीमा तेस्रो संस्करण र पथरीमा चौथो संस्करणको चिचिरी, गेन्द्रो दिवस मनाइएको केन्द्रका सहअध्यक्ष केदार धिमालले लिम्बुवान खबरलाई बताउनु भएको छ ।