ताप्लेजुङ, २६ पौष । किरात याक्थुङ चम्लुङ इजरायलको आर्थिक सहयोगमा ताप्लेजुङ सदरमुकाम फुङ्लिङ स्थित तोक्मे डाँडामा निर्मित धान नाच प्रतिमा (ताक्वाजङ या: सक्मादेन)को उद्धाटन गरिएको छ । बिहीबार करिब ८० लाखको लागतमा निर्मित उक्त प्रतिमाकाे कियाचु संघीय अध्यक्ष प्रेम यक्तेनको प्रमुख आतिथ्यतामा उद्घाटन गरिएको हो ।

लिम्बु याक्थुङ् जातिको ऐतिहासिक, सांस्कृतिक परम्परालाई जीवन्त राख्न र त्यस ठाउँको इतिहासलाई लोप हुन नदिन कियाचु इजरायलको आर्थिक व्यवस्थापन तथा संयोजकत्वमा दुई महिला र दुई पुरुष धान नाचिरहेको प्रतिमा निर्माण गरिएको छ ।

पाँच फिट उचाईको पिलरमा रहेको प्रतिमाको पृष्ठभूमिमा कुम्भकर्ण हिमाल (फक्ताङलुङ), मुक्कुम्लुङको तस्वीर कोरिएको छ । निर्माणका लागि स्थानीय कृतिमान मादेनको संयोजकत्वमा किरात याक्थुङ चुम्लुङ जिल्ला ताप्लेजुङका पदाधिकारी सहितका ९ सदस्य निर्माण समिति गठन गरिएको थियो ।

उक्त समितिले भाद्र अन्तिमसम्म निर्माण सक्नेगरी काम सुरु गरेको भएतापनि केही ढिला गरी कार्य सम्पन्न गरेको हो । कांशको चार या ःलाङ (धान नाच) प्रतिमा बनाउन राष्ट्रिय तथा अन्तर्राष्ट्रिय अनुभव भएका मूर्तिकार पूर्ण वनेमसहित चार कालीगढ खटिएका थिए ।
धान नाँच याःलाङ प्रतिमा पुरुषको ६.५ र महिला ६ फिट उचाईमा निर्माण भएको संयोजक मादेनले बताए ।

स्तम्भको उद्धघाटन कार्यक्रममा धान नाच, च्याबुङ नाच (केःलाङ) समेत प्रस्तुत गरिएको थियो । कार्यक्रममा कियाचु इजराइलकी अध्यक्ष नुमा काङभाकाे समेत उपस्थिति रहेकाे थियाे । कार्यक्रम जिल्ला अध्यक्ष इन्दीरा मेन्याङबाेकाे सभापतित्वमा सम्पन्न भएकाे थियाे ।

प्रतिमा उद्घाटनको अवसरमा साँझ राष्ट्रिय कलाकारहरूको साथमा भव्य संस्कृतिक कार्यक्रम समेत भएको थियो । उक्त सांस्कृतिक कार्यक्रमको आकर्षणका रूपमा गायिका रुक्साना लिम्बु, दिपा सुहाङ, नोगेन लिम्बु ,पुष्पाञ्जली तिलिङ (चपेतीको आमा), सुनिता केदेम र सेमिहाङ सिङ्गकले आ–आफ्ना प्रस्तुति दिएका थिए ।