दमक, १२ माघ । ताप्लेजुङस्थित किरात याक्थुङ जातीहरुको मुन्धुमी स्थल मुक्कुमलुङ्मा निर्माणाधिन केवलकार विरुद्धको आन्दोलन पुनः शुरु भएको छ । सोमबार एकैदिने पूर्व लिम्बुवानको नौ वटै जिल्लाहरुको विभिन्न शहरहरुमा कोणसभा गर्दै मुक्कुमलुङ संरक्षण संयुक्त संघर्ष समितिले कोणसभा गरेर कार्यक्रम घोषणा गरेको हो ।
संयुक्त संघर्ष समिति तथा अन्तरदलीय समितिले मुक्कुमलुङमा बन्न लागेको केवलकारले याक्थुङहरुको मुन्धुमी आस्थाको धरोहरमाथि ठाडो प्रहार भएको बताउँदै बर्षौदेखी आन्दोलनरत छन् । गत बर्ष माघ १२ गते संघर्ष समितिका कार्यकर्ताहरुमाथि गोली प्रहार गरी घाइते बनाइएको बर्षदिनको अवसर पारेर सोमबार कार्यक्रम सार्वजनिक गर्दै थप संघर्षका कार्यक्रमहरु अगाडि बढाउने केवलकार खारेजी संघर्ष समितिका संयोजक खगेन्द्र फेम्बुले बताउनु भयो ।
सोमबार ताप्लेजुङबजार, पान्थरको फेदेन, इलाम बजार, झापाको विर्तामोड र दमक, मोरङको पथरी, सुनसरीको धरान, धनकुटा बजार, तेह्रथुममो मेयङलुङ लगायत स्थानमा संघर्ष समितिले कोणसभा गर्दै सरकारलाई खबरदारी गरेको छ ।
केवलकार निर्माण नारोकिए थप आन्दोलन शसक्त बनाउने उनीहरुले चेतावनी दिएका छन् । संघर्ष समितिले चरणबद्ध कार्यक्रम गर्ने, कान्छीथान देखी मुक्कुमलुङसम्म धागो टाङ्गने कार्यक्रमका साथै १७ गते बृहत जनसहभागितामा ताप्लेजुङमा सभा गर्ने बताइएको छ ।