एजेन्सी । म्यानमारमा त्यहाँको सेनाले सैनिक ‘कू’ गरेको छ । त्यहाँको सेनाले सत्ता हातमा लिँदै एक वर्ष संकटकाल लगाएको समेत घोषणा गरेको छ ।

जनरल मिन आङ हलिङ्ग

म्यानमारका प्रजातन्त्रवादी नेतृ आङ सान सुकीलाई हिरासतमा लिएसँगै राष्ट्रपति विन मिन्ट र सुकीको पार्टी नेशनल लिग फर डेमोक्रेसीका बरिष्ठ नेताहरुलाई हिरासतमा लिँदै सेनाले सत्ता कब्जा गरेको हो ।

म्यानमार सैनिक टेलिभिजनमा एक सन्देश जारी गर्दै भनिएको छ– सत्ता अब सेनाका कमाण्डर इन चिफ वरिष्ठ जनरल मिन आङ हलिङ्गले हातमा लिएका छन् ।

केही दिनयता जारी सरकार र सेनाबीचको तनाव भई रहेको अवस्थामा म्यानमारमा सैनिक कू भएको हो । सेनाले सोमबार तय भएको संसद बैठक समेत खारेज गरेको छ ।

बीबीसीका अनुसार म्यानमारको राजधानीसहित मुख्य–मुख्य शहरमा सेनाले सैनिकको तैनाथी बढाएको छ साथै राजधानीमा टेलिफोन र इन्टरनेट सेवासमेत बन्द गरेको छ ।

गत नोभेम्बर महिनामा भएको निर्वाचनमा सुकीको पार्टी भारी मतसहित विजयी भएको थियो । तर सेनाले चुनावी प्रक्रियामा धाँधली भएको आरोप लगाउँदै आएको छ ।