काठमाडौं। बृहत् नागरिक आन्दोलनका अभियन्ता नारायण वाग्लेले फागुन ७ गते टुँडिखेलबाट नयाँ जनआन्दोलनको लहर सुरु हुने उद्घोष गरेका छन् ।

आज दिउँसो शोभा भगवतीमा आयोजित नागरिक समाजको विरोधसभामा बोल्दै वाग्लेले फागुन ७ गते काँडेतार हटाएर भएपनि टुँडिखेल पुग्ने र नागरिक–घोषणापत्र सार्वजनिक गरिने उद्घोष गरे ।

उनले भने, ‘म यसै मञ्चमार्फत् आह्वान गर्दछु, काँडेतार हटाएर भए पनि त्यो ठाउँमा उभिएर नागरिक सभा गर्ने हक हामीलाई छ । उक्त सभामा बृहत् नागरिक आन्दोलनको घोषणापत्र सार्वजनिक गरी नयाँ जनआन्दोलनको उभार निम्त्याउँछौं ।’

“जनताको खुन र पसिनाले बनेको सिंहदरबारमा नागरिकलाई भित्र पस्ने अधिकार छैन, अब हामीले ७० बर्ष देखिको एक–एक हिसाब माग्ने दिन आएको छ । आम नागरिकहरु अब अर्को जनआन्दोलनको लागि तयार रहौं” –अभियन्ता वाग्लेले आव्हान गरे ।

(फाइल तस्वीर)