तेह्रथुम । नेकपा विभाजनको प्रभाव स्थानीय तहसम्म परेको छ । ओली समुहमा लागेका कारण स्थानीय तहले कर्मचारी नै हटाउन थालेका छन् ।

पार्टी विभाजनमा फरक समूहमा लागेपछि नेकपा नेतृत्वमा रहेका स्थानीय तहले करारमा राखेका कर्मचारी हटाउन थालेका छन् ।

तेह्रथुमको छथर गाउँपालिकाले करारमा कार्यरत तीन जना कर्मचारीलाई हटाएको छ । गाउँपालिका अध्यक्ष सन्तवीर लिम्बुले स्वकीय सचिव सहित आफैँले नियुक्ति गरेका अन्य दुई जना करारका कर्मचारी हटाएका हुन् ।

गाउँपालिकाले करारमा कार्यरत तीन जना कर्मचारीको करार भङ्ग गरेको हो । गाउँपालिकामा करारमा कार्यरत कर्मचारीहरुलाई गाउँपालिकाले स्थानीय सरकारको मर्म, भावना, उद्देश्य र पेशाप्रति बफादार नभई समय र कामलाई बेवास्ता गरेको भन्दै कारवाही गरेको हो ।

गाउँपालिकाको आर्थिक बर्ष २०७७÷०७८ को साताँै गाउँसभा तथा चौँथो बजेट अधिबेसनबाट पारित नीतिगत निर्णय नम्बर १३ अनुसार स्थानीय सरकार संञ्चालन ऐनको दफा–१६ (क) ५ को व्यवस्थाअनुसार कारवाही गरेको हो ।

गाउँपालिकाका अनुसार कम्प्युटर अपरेटर तुलसीमान तिगेला, स्वकीय सचिव युवराज लुइटेल र सामाजिक परिचालक रमेशलाल श्रेष्ठलाई कारवाही गरेको हो ।

श्रोतका अनुसार कारवाहीमा परेका कर्मचारीमा २१ माघमा सदरमुकाम म्याङलुङ्गमा आयोजित ओली समूहको कार्यक्रममा सहभागी हुन गएका थिए । सोही दिन छथर गाउँपािलकामा प्रचण्ड–नेपाल समूहले पनि सभाको आयोजना गरेको थियो । सभालाई नेता योगेश भट्टराईले सम्बोधन गरेका थिए ।

अध्यक्ष लिम्बू भने प्रचण्ड–नेपाल समूहसँग नजिक छन् । तर उपाध्यक्ष तारादेवी ढकाल भने ओली समूहमा छिन् ।