काठमाडौं । सरकारले माघ ३० गते सार्वजनिक विदा दिने निर्णय गरेको छ । यो बर्षको सोनाम ल्होछार माघ ३० गते परेको हुँदा सोमबार बसेको मन्त्रिपरिषद बैठकले सो निर्णय गरेको हो ।

सोनाम ल्होछारलाई तामाङ्, ह्योल्मोलगायतका हिमाली आदिवासी जनजातीहरूले नयाँ वर्षको रुपमा मनाउने गर्दछन् ।

यसअघि सरकारले विभिन्न आदिवासी जनजातिहरुका चाडपर्वहरुलाई कार्यदिन बढाउन भन्दै चाड पर्वको बिदा कटौती गरेको थियो ।

तर संसद विघटनपछि विकसित राजनीतिक घटनाक्रमसँगै सरकारले यी चाड पर्वहरुमा फेरि सार्वजनिक बिदा दिन लागेको छ । यसअघि सरकारले माघे संक्रान्तिको दिन पनि सार्वजनिक बिदा दिएको थियो । तर पुस १५ मा मनाइएको तमु ल्होसारको दिन भने सरकारले सम्बन्धित जातीलाई मात्रै विदा दिएको थियो ।

सरकारले २०५१ सालदेखि सोनाम ल्होछारको दिन बिदा दिँदै आएको थियो । तर ओली नेतृत्वको सरकारले २०७४ सालदेखि सो दिनको बिदा पनि कटौती गरेको थियो । सरकारले वर्षमा पुरै बिदा दिने गरिएका १० वटालाई आंशिक बनाइएको थियो भने १२ वटा बिदालाई पूर्णरुपमा कटौती गरिएको थियो ।

(फाइल तस्वीरबाट)