काठमाडौं । नेकपाका प्रचण्ड–माधव पक्षले जनता समाजवादी पार्टी (जसपा)सँग आगामी सरकार गठनको विषयमा छलफल शुरु गरेको छ ।

बुधबार नेपाली कांग्रेसका सभापति शेरबहादुर देउवासँग छलफल गरेको यो पक्षले आज संसदको तेस्रो ठूलो दल जसपाका नेताहरुसँग छलफल शुरु गरेको हो ।

यसैक्रममा आज नेकपाको केन्द्रीय कार्यालय पेरिसडाँडामा पुष्पकमल दाहाल ‘प्रचण्ड’ र माधव नेपालले जसपाका अध्यक्ष महन्थ ठाकुर, वरिष्ठ नेता राजेन्द्र महतो र नेता राजेन्द्र श्रेष्ठसँग छलफल गरेको छ ।

संसद पुनःस्थापना सँगै हौसिएका प्रचण्ड–नेपाल समूहले नयाँ सरकार गठनका लागि गृहकार्य तीव्र पारेको छ । यस्तो अवस्थामा पार्टी फुट्छ या के हुने निर्वाचन आयोगले अझै पनि कुनै निर्णय गर्न सकेको छैन । संसद अधिवेशन पश्चात सरकारबारे छलफल हुन सक्ने विश्लेषकहरुको तर्क रहेका छ ।

अब राजनीति अवस्था परिवर्तन भएको अवस्थमा जसपाले पनि प्रचण्ड–माधव समूहसँग सहकार्य गर्न सक्ने संकेत देखाएको छ । यद्यपी जसपा भित्र हालसम्म पनि कार्यगत एकता हुन नसकिरहेको अवस्थामा यसै भन्न नसकिन्ने बताइएको छ ।

हाल प्रतिनिधिसभामा जसपाका ३४ जना सांसद रहेका छन् । त्यसमा हरिनारायण रौनियार र रेशमलाल चौधरी निलम्बनमा छन् ।