कमल। प्रधानमन्त्री केपी शर्मा ओलीले आफ्नो निर्वाचन क्षेत्र झापाको चाइना नेपाल फ्रेण्डसीप इन्डस्ट्रियल पार्कको शिलान्यास गरेका छन् । त्यसैगरी आजै झापाको कमल २ स्थित कमल खोलामा निर्माण गरिएको पक्की पुलको उद्घाटन गरेका छन् ।

आजै दमक देखि कमल गाउँपालिका जोडिने पुल, दमक देखि चुलाचुली जोडिने पुल लगायत झापाका चार पुलको उद्घाटनपछि प्रधानमन्त्री ओलीले चीन नेपाल मैत्री औद्योगिक पार्कको शिलान्यास गरेका हुन् ।

प्रधानमन्त्री ओलीले अविश्वासको प्रस्तावबाट आफूलाई हटाएर देखाउन प्रचण्ड–माधव समूहलाई चुनौती दिएका छन् । ओलीले संसद पुनःस्थापना भएकोमा कुनै चिन्ता नभएको समेत प्रष्ट पारेका छन् । उनले देशको विकास रोक्न आफूलाई हटाउन खोजेको दावी गरेका छन् ।

औद्योगिक पार्क बन्ने क्षेत्रको जग्गा धनीहरुलाई मु–अब्जा वितरणमा अवैज्ञानिक र अव्यवहारिक भएको भन्दै संघीय लोकतान्त्रिक राष्ट्रिय मञ्च तथा संघीय लिम्बुवान मञ्च, नेपालले विरोध गर्दै आइरहेको छ । मञ्चले विकास निर्माणमा विरोध नगर्ने तर जनताको जनजिवीकाको सवालमा सरकार असक्षम भएको मञ्चका प्रान्तीय उपमहासचिव भानु भट्टराइले बताए ।

त्यस क्षेत्रका पिढीतहरुले मु–अब्जा पिढीत संघर्ष समिति नै गठन गरेर आफ्ना मागहरु राखेर आन्दोलनमा समेत रहेका छन् ।

आजै प्रधानमन्त्री ओलीले मदन भण्डारी लोकमार्गमा निर्माणाधिन ३१ पुलको एकैचोटि शिलान्यास गरेका छन् ।