लिम्बुवानखबर, १७ माघ । आज तामाङ समुदायले नयाँ वर्षको रुपमा माघ शुक्ल प्रतिपदाका दिन मनाउने सोनाम ल्होछार पर्व देशविदेशमा विविध कार्यक्रम आयोजना गरी मनाइँदैछ । यस बर्ष सरकारले सार्वजनिक विदा दिएको छ ।

आज देश तथा विदेशमा रहेका विभिन्न जिल्लाहरुमा बसोबास गर्ने तामाङसहित ह्योल्मो, थकाली, जिरेल, नेस्याङ्वा, भोटे, दुरा, लेप्चा आदि जातिले समेत आ–आफ्नै शैली र परम्पराअनुसार यो पर्व मनाउँने गर्दछन् ।

आजदेखि २८५८ औं वर्ष सुरु भएको छ भने यो बर्षलाई बाघ वर्षको रुपमा मनाउँदैछन् ।

प्रत्येक वर्ष माघ शुक्ल प्रतिपदाका अवसरमा सोनाम ल्होछार पर्व मनाइन्छ । १२ वटा मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर वर्गमा सांस्कृतिक परम्परा अनुसार सोनाम ल्होछारलाई विभाजन गरिएको छ । प्रकृति पुजकको मानिएका कारण ल्होछारका १२ वटै वर्ष पशुपन्छीको नामबाट गणना गरिएको बताइन्छ ।

यस वर्ष ओमिक्रोन भेरियन्टसहितको कोरोना महामारीका कारण औपचारिक कार्यक्रम नगर्ने बताइए पनि स्वास्थ्य सुरक्षाका विधि अपनाएर बौद्ध क्षेत्रका चैत्यमा पूजापाठ गरी ल्होछार मनाउने बताइएको छ । विगत वर्षमा बौद्ध क्षेत्रमा सोनाम ल्होछारका अवसरमा सांस्कृतिक झाँकीसहित बाजागाजाको ¥याली निकालिने गरिएको थियो ।

यसैगरी राजधानीको स्वयम्भू क्षेत्रका चैत्यमा आन्तरिक रुपमा मात्र पूजा पाठका कार्यक्रम गरी ल्होछार मनाइने बताइएको छ । यसैगरी देशको विभिन्न गुम्बाहरुमा तामाङ् जातीहरुले धार्मिक परम्परा अनुसार ल्होछार पर्व मनाउने बताइएको छ ।