लिम्बुवानखबर, ४ फागुन । स्थानीय तहको निर्वाचनमा राष्ट्रिय दलको मान्यता पाएको ६ वटा राजनीतिक दलका उम्मेदवारहरुले मात्रै आफ्नो दलको चुनाव चिहृन पाउने भएका छन् ।

निर्वाचन आयोगले जनाए अनुसार आगामी स्थानीय तहको चुनावमा ६ दलले मात्र आफ्नो दलको चिन्ह पाउने छन् । राष्ट्रिय दलको मान्यता नपाएका राजनीतिक दलका उम्मेदवारहरुलाई भने स्वतन्त्र उम्मेदवारको रुपमा चिनिने छन् भने उनीहरुलाई सोही अनुरुप चुनाव चिहृन प्रदान गर्ने जनाएको छ ।

राजनीतिक दल सम्बन्धी ऐन २०७३ को दफा ५२ मा राष्ट्रिय दलको मान्यतासम्बन्धी व्यवस्था छ । जहाँ प्रतिनिधिसभा निर्वाचनमा समानुपातिकतर्फ ३ प्रतिशत र प्रत्यक्षतर्फ एक सिट जितेका दलहरुलाई मात्रै राष्ट्रिय दलको मान्यता पाउने उल्लेख छ । नेकपा एमाले, नेपाली कांग्रेस, नेकपा माओवादी केन्द्र, एकीकृत समाजवादी, जनता समाजवादी पार्टी र लोकतान्त्रिक समाजवादी पार्टी, नेपालले मात्र दलको चुनाव चिन्ह पाउने छन् ।

स्थानीय तह निर्वाचन ऐन २०७३ को दफा २६ को उपदफा ६ मा राष्ट्रिय दलका उम्मेदवारलाई मात्र दलीय निर्वाचन चिह्न दिइने व्यवस्था रहेको उल्लेख छ ।

यद्यपी आयोगले ६ वटा दललाई मात्र चुनाव चिन्ह दिए अन्य साना दलहरुले आन्दोलनमा जाने चेतावनी दिएका छन् । राप्रपा, जनमोर्चा, मजदुर किसान पार्टी, विवेकसिल साझा, संघीय लोकतान्त्रिक राष्ट्रिय लगायत विभिन्न प्रदेशहरुमा प्रदेश थ्रेस होल्ड कटाई प्रदेश सभामा सहभागी दलहरुले विरोध जनाउँदै आन्दोलन समेत गर्ने जनाएका छन् ।