दमक, ११ फाल्गुन । दमकमा आज बिहिबारदेखि ९ दिनसम्म फुड फेस्टिबल आयोजना हुने भएको छ । होटल व्यवसायी संघ दमकको आयोजनामा फागुन ११ गतेदेखि १९ गतेसम्म सञ्चालन हुने ९औं फुड फेस्टिबलको आवश्यक तयारी अन्तिम चरणमा पुगेको हो ।

बुधबार संघले एकपत्रकार भेटघाट कार्यक्रम आयोजना गरी सो जानकारी गराएको हो । फेस्टिबल सम्पन्न गर्न संघका केन्द्रीय सदस्य भुपेन्द्र न्यौपानेको संयोजकत्वमा मूल आयोजक समिति गठन गर्नुका साथै विभिन्न उपसमिति गठन गरि काम भैरहेकोखछ ।

दमक –७ स्थित पशुहाटको मैदानमा आयोजना गरिने फुड फेस्टिबलमा विभिन्न समुदायका परिकार र पेय पदार्थ र स्थानीय कृषि उत्पादन लगायतका व्यवसायिक स्टलहरु रहने छन् । ५० हजार बढी दर्शकले अवलोकन गर्ने अनुमान गरिएको सो फेस्टिबलमा ५० लाख बराबरको कारोबार हुने संयोजक न्यौपानेले बताए ।

फेस्टिबलका दौरान चर्चित गायिका मेलिना राई, एलिना चौहान, अस्मिता अधिकारी, ज्योति मगर लगायतका राष्ट्रिय कलाकारको समेत प्रस्तुति रहने आयोजकले जनाएको छ ।

विगत ९ वर्षदेखि दमकमा स्थानीय खाद्य परिकार र पर्यटन प्रवर्द्धनको निम्ति फुड फेस्टिबल हुँदै आएको छ ।