दमक, २८ माघ । झापाको दमकमा आजबाट पाँचौ दमक महोत्सव सुरु हँुदैछ । १५ दिन सम्म चल्ने यो महोत्सवमा ३ करोड बढिको आर्थिक कारोबार हुने दावी गरिएको छ । दमक उद्योग वाणिज्य सघंले आयोजना गरेको यो महोत्सवमा १ सय भन्दा बढि स्टलहरुमा बिभिन्न ब्यापारीहरुले बुकिङ गरिसकेका छन् ।

फागुन १२ गतेसम्म चल्ने महोत्सवमा भारतका बिभिन्न व्यवसायीक सस्थाहरुले समेत स्टल बुकिङ गरेका छन् भने अन्य सबै स्टल दमकका उद्योगी तथा व्यवसायीहरुको रहेको महोत्सव संयोजक राजु खड्काले जानकारी दिएका छन् ।

अहिले आर्थिक मन्दिको मार खेपीरहेका व्यापारीहरुकालागि यो महोत्सवले केहि राहत दिने विस्वास गरिएको आयोजकले जनाएको छ । व्यापारीको अहिलेको समस्याका बारेमा केहि अवगत गराउँदै त्यसमा सरकारका तर्फबाट केहि सम्बोधन गराउन बिभागीय मन्त्रीलाई महोत्सवको उद्धघाटनका लागि बोलाइएको सघंका अध्यक्ष गोपाल गुरागाईले वताए ।

सोही अनुरुप अर्थमन्त्री प्रकाश शरण महतले आज माध्यान्हमा महोत्सवको उद्धघाटन गर्ने गरी समय तय गरिएको अध्यक्ष गुरागाईले बताए । यस्तै आज महोत्सव अवलोकन गर्न सबैकालागि निशुल्क व्यवस्था समेत गरिएको उनले बताए ।

दमक ७ को सयपत्री टोल स्थित रतुवा खोला किनारमा लाग्ने महोत्सवमा अन्य दिन भने एक सयको प्रवेश शुल्क लाग्नेछ । महोत्सवमा दैनिक स्थानीय तथा राष्ट्रिय कलाकारहरु सांगीतिक प्रस्तुति रहने प्रचार प्रसार उपसमितिका संयोजक तुलसीराम तिम्सीनाले बताए ।

उनका अनुसार महोत्सवमा उद्घाटनमा यहाँको साँस्कृतिक पहिचानहरुको प्रर्दशनी लगायतका कार्यक्रमहरु पनि रहेकाछन् । महोत्सवबाट बचत हुने रकम निर्माणाधीन इलम प्रशिक्षण केन्द्रमा खर्च गरिने उद्योग वाणिज्य संघ दमकले जनाईएको छ ।