झापा, १९ माघ । नेपाल आदिवासी जनजाति पत्रकार महासंघ (फोनिज) झापा शाखाको सातौ जिल्ला अधिबेशन आज हुँदैछ । कार्यक्रमको सम्पूर्ण तयारी पुरा भएकाे जिल्ला अध्यक्ष भूमिका फियाक लिम्बुले बताइन् ।

आज बिर्तामोडस्थित सिटी सेन्टरमा हुने जिल्ला अधिबेशन फाेनिजका संघीय अध्यक्ष गजुरधन राइकाे प्रमुख आतिथ्यतामा अधिवेशनकाे उद्धघाटन हुने कार्यक्रम रहेकाे छ ।

यसैगरी अधिवेशनकाे अवसरमा फोनिज झापाले वितरण गर्देआएको स्व. डिकमान विरही सुनुवार स्मृति वर्ष उत्कृष्ट पत्रकारिता पुरस्कार, दुई जनालाई फोनिज उदीयमान पत्रकारिता पुरस्कार प्रदान गरिनुका साथैं फोनिज झापाले प्रकाशन गरेको स्मारिकाको बिमोचन समेत गरिने कार्यक्रम रहेको अध्यक्ष फियाकले बताइन् ।

फोनिजका जिल्ला सचिव तिलक योञ्जनका अनुसार स्व. डिकमान विरही सुनुवार स्मृति पत्रकारिता पुरस्कारबाट झापा, दमकका पूराना पत्रकार विष्णु सुब्बा र फोनिज उदीयमान पत्रकारिता पुरस्कार २०८१ बाट सूर्योदय टेलिभिजनमा कार्यरत पत्रकार रविकिरण बान्तावा राई र हरप्रहर न्यूज डटकममा कार्यरत दमकका सजन राईलाई प्रदान गरिने बताइएकाे छ ।

डिकमान पुरस्कारको राशी नगद २५ हजार रूपैयाँ र उदीयमान पत्रकारिता पुरस्कारको राशि ५/५ हजार रूपैयाँ रहेको छ ।
यसैगरि, जिल्ला अधिबेशनको बन्दसत्रले फोनिज झापाको आगामी कार्यकालका लागि नयाँ नेतृत्व  चयन र केन्द्रिय महाधिवेशन प्रतिनिधिकाे समेत चयन हुने निवर्तमान अध्यक्ष बिशाल नेम्बाङले बताए ।