दमक, ४ चैत । किरात याक्थुङ चुम्लुङको १२औं राष्ट्रिय महाधिवेशन चैत १२, १३ र १४ गते तीन दिवसीय हुने भएको छ ।

झापाकाे भद्रपुर नगरपालिकास्थित चन्द्रगढीमा कियाचु झापाकाे व्यवस्थापन तथा भद्रपुर नगर शाखाको सह–व्यवस्थापनमा १२औं राष्ट्रिय महाधिवेशन हुन लागेकाे हाे ।

अधिवेसनको पहिलो दिन विभिन्न जातीय झाँकी सहितको र्यालीले नगरपरिक्रमा गरी रंगशाला परिशरमा विविध सांस्कृतिक कार्यक्रम सहित  उद्घाटन  गरिने महासचिव निरन्ती तुम्बापाेले बताइन् ।

खुल्लासत्र समापन पश्चात १२ गते साँझबाटै अधिवेसनको बन्दसत्र शुरू गरिनेछ उक्त बन्दसत्रले सांगठनिक प्रतिवेदन, नो कोशी, मुक्कुमलुङमा नो केबुलकार, पहिचान, भाषा साहित्य, आदिवासीको सवाल सम्बोधनका लागि नीतिनिर्माणको विषयमा छलफल हुनेछ– महासचिव तुम्बापाेले भनिन् ।

‘चैत १४ गते नयाँ संघीय कार्य समिति चयन गर्दै कियाचु १२औं राष्ट्रिय महाधिवेशन सम्पन्न हुनेछ ।’– उनले भनिन् ।

अधिवेसनमा प्रदेश, जिल्ला, सम्बन्धन प्राप्त थरगत समितिहरु, विदेशस्थित शाखाहरूबाट समेत सहभागी हुनेछन् ।

महाधिवेशनमा नेपालको १५ जिल्ला, २ प्रदेश शाखा, विषयत ६ समिति, विदेशस्थीत चुम्लुङको २० शाखा र याक्थुङ थरगतको २८ समितिका करिब ५ सय प्रतिनिधि तथा पर्यवेक्षक सहभागी हुने महासचिव तुम्बापोले जानकारी गराइन् ।

अधिवेसन सफल बनाउँन विभिन्न उपसमिति बनाई तिब्र गतिमा तयारीको काम भइरहेकाे अधिवेसन व्यवस्थापक तथा किरात याक्थुङ चुम्लुङ झापाका अध्यक्ष सेसेहाङ फियाकले लिम्बुवानखबरलाइ जानकारी गराएका छन् ।