काठमाडौं। प्रधानमन्त्री केपी शर्मा ओली र नेत्रविक्रम चन्द विप्लवले एउटै मञ्चबाट संयुक्त सम्बोधन गर्ने भएका छन् । आज भएको तीन बुँदे सहमतिलाई कार्यान्वयन गर्ने प्रतिबद्धता स्वरुप प्रधानमन्त्री ओली र नेकपा महासचिव विप्लवले सम्बोधन गर्न लागेका हुन् ।

आज बसेको तेस्रो चरणको वार्तामा सरकारसँग प्रतिबन्धित नेकपा विप्लव समूहको तीन बुँदे सहमति गरेसँगै यो समूहले हिंसा छोड्ने भएको हो ।

सरकारले यो समूहमाथिको प्रतिबन्ध समेत हटाएको हुँदा नेपाल प्रहरीलाई विप्लवका नेता कार्यकर्ता कोही कसैलाई नपक्रन आदेश दिएको छ ।

राष्ट्रिय सभागृहमा विशेष समारोहका बिच फागुन २१ गते दिउँसो २ बजे प्रधानमन्त्री ओली र विप्लवले एउटै मञ्चबाट सम्बोधन गर्ने सरकार पक्षका वार्ता समिति सदस्य राजन भट्टराईले बताए ।

वार्ताका लागि सरकारले गृहमन्त्री रामबहादुर थापा बादलको संयोजकत्वमा दुई सदस्य समिति र विप्लव समूहले पार्टी प्रवक्ता खड्गबहादुर विश्वकर्मा प्रकाण्डको नेतृत्वमा वार्ता टोली गठन गरेको थियो .