धरान। नेपाल खानेपानी संस्थानलाई बोर्डमा गाभेकोप्रति संघीय लिम्बुवान मञ्च नेपालले आपत्ति जनाएको छ । आज मञ्चले धरान उपमहानगरका प्रमुख तिलक राईलाई ज्ञापन–पत्र बुझाएको छ ।

धरान खानेपानी व्यवस्थापन बोर्डमा आउनुअघि सञ्चालित एकीकृत सहरी विकास आयोजना (आइयुडिपी) को लेखा परीक्षण सार्वजनिक गर्नुपर्ने माग गरेको छ ।

मञ्चले आइयुडिपी आयोजना असफल भएको दाबी गरेको छ । प्रमुख राईले विज्ञ समूहले दिएको प्रतिवेदनपछि मात्रै गाभ्ने बताउँदै आए पनि हाल आएर आफ्नो पार्टीलाई समेत जानकारी नदिई गाभेकोप्रति आपत्ति रहेको मञ्चका धरान अध्यक्ष सञ्जुहाङ सावाँ लिम्बूले बताए ।

उनले धरानमा भएका सबै साना–ठूला राजनीतिक दलका प्रतिनिधिलाई जानकारी दिएर गाभ्नुपर्ने भए पनि एकलौटी ढङ्गबाट गाभिएको दाबी गरे । ज्ञापन–पत्र मञ्चका जिल्ला अध्यक्ष अमर इजमलगायत नेताको उपस्थितिमा बुझाइएको थियो ।