काठमाडौं । जनता समाजवादी पार्टी (जसपा)को संसदीय दलको बैठक आज(मंगलबार) बस्ने बताइएको छ ।

दिउँसो १ बजेदेखि बस्ने बैठकमा संसदमा कसरी प्रस्तुत हुने भन्नेलगायत वर्तमान समयमा नयाँ राजनीतिक घटनाक्रमको बारे छलफल हुने एक नेताले बताए ।

गत आइतबार बोलाइएको पुनःस्थापित संसदको पहिलो बैठकमा अध्यादेश पेश गर्न अनुमति दिइएको विरोधमा नेपाली कांग्रेस र जसपाले बैठक अवरुद्ध गरेका थिए ।

विरोधका बाबजुद सभामुख सापकोटाले कानुन न्याय तथा संसदीय मामिलामन्त्री लीलानाथ श्रेष्ठलाई संवैधानिक अध्यादेशसम्बन्धी विधेयक पेश गर्न अनुमति दिएपछि कांग्रेस र जसपाका सांसदले नाराबाजी गर्दै रोष्टम घेरेका थिए ।

राजनीति घटनाक्रमलाई थप पेचिलो पार्दै सर्वोच्च अदालतले नेकपालाई बदर गरि पूर्व एमाले र माओवादी केन्द्रलाई व्युँताइदिएपछि भावी सत्ता समीकरणमा नेपाली कांग्रेस र जसपा निर्णायक देखिएका छन् । जसपाको ३४ संसद छन् त्यसमा एक जना निलम्बित र एक जेलबन्दी रहेका छन् ।