दमक। राष्ट्रिय प्रजातन्त्र पार्टी (राप्रपा)को प्रदेश १ को अध्यक्षमा दमकका राम थापा चयन भएका छन् । राप्रपाको अन्तरिम विधान अनुसार केन्द्रिय समितिले थापालाई प्रदेश १ अध्यक्षमा चयन गरेको हो ।

कमल थापा, पशुपति शमशेर राणा र डा. प्रकाशचन्द्र लोहनी अध्यक्ष रहेको तीन वटा पार्टी एकिकरण पछि बनेको राप्रपाले प्रदेश स्तरमा अध्यक्ष र उपाध्यक्ष चयन गरेको हो । सोहि अनुसार एकिकृत पार्टीको प्रदेश अध्यक्षमा दमकका राजनैतिक व्यक्ति थापा चयन भएका हुन् । त्यसैगरी पार्टीको प्रदेश उपाध्यक्षमा पाँचथरका सगुन सुन्दर लावती चुनिएका छन् । लावती पूर्व गृहमन्त्री पद्यमसुन्दर लावतीका कान्छा छोरा हुन् ।

एकिकृत पार्टीको प्रदेश अध्यक्षमा चयन भएपछि अब केहि दिन भित्रमै अध्यक्ष र उपाध्यक्ष बसि अन्य नेताहरुको समेत सल्लाहमा प्रदेश समितिलाई पुर्णता दिईने अध्यक्ष थापाले बताउनु भयो । पार्टी एकीकरण पछि कार्यकर्तामा उत्साह आएको भन्दै उहाँले अब राप्रपालाई बैकल्पिक शक्तिको रुपमा स्थापित गर्ने गरी प्रदेशमा संगठन निर्माण गरिने बताउनु भयो । कांग्रेस कम्युनिष्टहरुले मुलुक बिकास र स्थायीत्व दिन सक्दैनन भन्ने प्रमाणित भएकोले पनि आफुहरुको आवश्यकता पुष्टि भएको उहाँले बताउनु भयो ।