लिम्बुवानखबर, २४ फाल्गुन । लिम्बु जातीहरुको सर्वोच्च संस्था किरात याक्थुङ चुम्लुङको ११औँ महाधिवेशन आगामी फाल्गनु २८, २९ र ३० गते पान्थरको फेदेनमा हुने भएको छ ।
यो महाधिवेशनबाट चुम्लुङको नयाँ नेतृत्व चयन हुनेछ । महाधिवेशन सम्पन्न गर्न विविध विषयहरुमा गम्भिर छलफल र निर्णयहरु अगाडि बढाउने तयारी भइरहेको चुम्लुङ केन्द्रीय सचिवालय टिमले जानकारी दिएको छ ।
हाल कियाचुको १३ वटा जिल्ला कार्यसमिति र २ वटा प्रादेशिक समिति रहेको छ । त्यसैगरी विभिन्न प्रवासहरुमा समेत चुम्लुङ् सक्रिय रहेको छ । यस्तैगरी ६ वटा विषयगत समितिहरु रहेको छ । लिम्बू सांस्कृतिक परिषद्, लिम्बुवान अध्ययन केन्द्र, लिम्बू भाषा, साहित्य प्रतिष्ठान, पुनःजीवन केन्द्र, याक्थुङ सहयोग कोष र उपत्यका एम्बुलेन्स सेवा यसको विषयगत समितिहरु हुन् ।
यसबीचमा विषयगत समितिहरुले आफूहरुले केन्द्रीय समितिमा प्रतिनिधित्व पाउनु पर्ने आवाज उठाउँदै आएको छ । विषयगत समितिहरु कियाचुको विधानमा रहेर आफ्नै छुट्टै विनियामवलीमा सञ्चालित हुँदै आइरहेको छ तर केन्द्रीय समितिमा प्रत्यक्ष सहभागीता हुँदैन् ।
जिल्ला कार्यसमिति र प्रादेशिक समितिबाट केन्द्रको लागि एक महिला र एक पुरुष रहने गरी केन्द्रीय सदस्यमा आउनु पाउने व्यवस्था छ । यस्तै पदाधिकारीको हकमा भने एक कार्यकाल केन्द्रीय समितिमा काम गरेकोले मात्र पाउने व्यवस्था गरिएको छ । अध्यक्षको भने दुई कार्यकाल गर्न पाउने व्यवस्था रहेको छ । हालका अध्यक्ष योगराज वनेमको एक कार्यकाल मात्र पूरा भएको छ भने नेतृत्व टिम कस्तो आउँछ भन्ने सबैमा चासोको विषय बनेको छ ।
यतिबेला लिम्बू समुदायको प्रतिनिधिमुलक साझा संस्था भन्ने चुम्लुङले आम समुदायको साझा नेतृत्वदायी भूमिका कसरी निर्वाह गर्छ भन्ने पनि बहस शुरु भएको छ ।
चुम्लुङको हरेक ३÷३ वर्षमा महाधिवेशन हुने व्यवस्था विधानमा रहेतापनि विश्वव्यापी कोरोना भाइरस महामारीको कारण गत वर्ष फाल्गुनमा हुने महाधिवेशन विधानले व्यवस्था गरे अनुसार एक वर्ष समय थपिएको थियो । थपिएको समय अवधि यहि फाल्गुनमा सकिन्दैछ । यसअघि दशौँ महाधिवेशन सुनसरी, धरानमा भएको थियो ।
Related