दमक, ६ चैत्र । राष्ट्रिय शहीद मनिल तामाङकाे १३औं श्रद्धाञ्जली सभा भव्यरुपमा मनाइएको छ । शहीद राजकुमार आङ्देम्बे ‘माङतोक’–मनिल तामाङ् स्मृति प्रतिष्ठानले मनिल समाधीस्थलमा श्रद्धाञ्जली सभाको आयोजना गरेको छ ।
प्रतिष्ठानका महासचिव दिलकुमार लावतीको सभाध्यक्षता तथा संघीय लोकतान्त्रिक राष्ट्रिय मञ्चका उपाध्यक्ष ज्ञानुहाङ इम्त्रुङ्को प्रमुख आतिथ्यतामा भएको कार्यक्रममा झापा जिल्लाका नेताहरुको उपस्थिति रहेको थियो । कार्यक्रमलाई उपाध्यक्ष इम्बुङले सम्बोधन गर्दै शहीदको सपना पुरा नभएको हुँदा निरन्तर आन्दोलनमा सरिक भइरहेको हुँदा शहीद प्रति सम्मान भएन कि भन्ने अनुभूति नगर्न शहीद परिवारलाई अनुरोध गर्नु हुँदै लिम्बुवान र पहिचानको राजनीति लक्ष्य प्राप्ति तर्फ उन्मुख हुँदै गएको हुँदा एकदिन शहीदको सपना पुरा हुने प्रतिबद्धता व्यक्त गरेका छन् ।
यसरी नै कार्यक्रममा मञ्चका प्रान्तीय सचिव धनबहादुर पन्धाक, मञ्चका झापा जिल्ला अध्यक्ष नगेन राई लगायतले श्रद्धाञ्जली मन्तव्य राखेका थिए । कार्यक्रमलाई प्रतिष्ठानका सदस्य पदम तामाङको संचालन तथा सदस्य मनोहर थलङले स्वागत मन्तव्य राखेका थिए ।
यसैक्रममा शहीद मनिल तामाङको स्मृतिमा ताप्लेजुङ, पान्थर, इलाम, सुनसरी, तेह्रथुम लगायत जिल्लाहरुमा समेत श्रद्धाञ्जली कार्यक्रम भएको छ भने प्रवासमा कतार, दुवई, साउदी, दक्षिण कोरिया, यूके लगायत विभिन्न देशहरुमा श्रद्धाञ्जली कार्यक्रम भएको खबर प्राप्त भएको छ ।
संघीय शिक्षा लागू गराउन र स्ववियू निर्वाचन प्रणाली पूर्ण समानुपातिक पद्दतीबाट हुनु पर्छ भन्ने आन्दोलनको क्रममा २०६५ चैत्र ६ गते प्रहरीको गोली लागी धुलाबारी क्याम्पसमा तामाङ्ले सहादत्ता प्राप्त गरेका थिए ।
Related