दमक, ८ चैत । प्रदेश १ कै सर्वाधिक राशीको दमक गोल्डकपको सम्पूर्ण तयारी पूरा भएको छ । भोलि बुधबारबाट दमक नगरपालिकाको नगर खेलकुद विकास समितिको आयोजनामा हुने उक्त गोल्डकपको सम्पूर्ण तयारी पूरा भएको जनाएको छ ।

आज दमक–३ स्थित प्रस्तावित मदन भण्डारी अन्तर्राष्ट्रिय रंगशालामा पत्रकार सम्मेलनको आयोजना गर्दै आयोजकले प्रतियोगितामा चार विदेशी टोलीसहित दश टिमको सहभागिता रहने जनाएको छ ।

प्रतियोगितामा साविक विजेता नेपाल पुलिस क्बल, आयोजक दमक–११, त्रिभुवन आर्मी फुटबल क्लब, मनाङमस्र्याङ्दी फुटबल क्लब, बागमती युथ क्लब, गोर्खा ब्वाइज पुलिस क्लब भारत, मानेभञ्ज्याङ फुटबल क्लब दार्जेलिङ, दुर्गापुर सन्डे क्बल कोलाकाता, एमिनियर फुटबल क्लब क्यामरुनको सहभागिता रहने खेल संयोजक मोहन मगरले जानकारी दिए । प्रतियोगिता १८ चैतमा सम्पन्न हुनेछ । भोली हुने उद्घाटन खेलमा आयोजक दमक–११ र बागमती युवा क्लब सर्लाहीबीच खेल हुनेछ ।
प्रतियोगिताका लागि मैदान सम्याउने, प्याराफिट निर्माण लगायतको काम सकिएको दमक नगर खेलकुद विकास समितिका अध्यक्ष भीमराज चौलागाईले जानकारी दिए । पाँच हजारदेखि सात हजार दर्शक क्षमताको प्याराफिट निर्माण गरिएको उनले बताए । प्रतियोगिताको उद्घाटन प्रदेश सांसद अर्जुन राईले गर्ने बताइएको छ भने समापन पूर्वप्रधानमन्त्री तथा एमाले अध्यक्ष केपी शर्मा ओलीले गर्ने जनाईएको छ ।

प्रतियोगिताको विजेताले रु १३ लाख ११ हजार सहित ट्रफी, मेडल प्रदान गरिने छ भने उपविजेताले रु ६ लाख ११ ट्रफी र मेडल पाउनेछन् । यसैगरी सर्वोत्कृष्ट खेलाडीलाई एक थान मोटरसाइकल दिइने अध्यक्ष चम्लागाईंले बताएका छन् ।

साथै खेलमा सर्वाधिक गोलकर्ता, उत्कृष्ट गोलरक्षक, डिफेन्डर, मिडफिल् डर, फरवाड र प्रशिक्षकले जनही रु २१ हजार रुपैयाँ पाउने आयोजकले जनाएको छ ।