मेयङलुङ, १५ चैत । तेह्रथुम स्थित ५ वटा कृयासिल राजनीति दलहरुले आगामी बैशाख ३० गते हुने स्थानीय निर्वाचनलाई लक्षित गर्दै चुनावी मोर्चा गरेका छन् । आज एक विज्ञप्ति जारी गर्दै दलहरुको केन्द्रिय गठबन्धनलाई जिल्ला स्थित पनि यथावत कायम राख्न सहमत भएको जानकारी गरिएको छ । मोर्चा स्थानीय निर्वाचनमा एमाले विरुद्ध एकभएर लड्न बनेको हो ।

यो गठबन्धन स्थानीय निकायको निर्वाचनमा समेत एक भएर चुनावी प्रतिस्पर्धा गर्ने भनिएको छ । तेह्रथुम जिल्लामा स्थानीय सरकारले अहिले नेतृत्व गरिरहेको र उसले गरेका सबै भ्रष्टाचार, अनियमितता लगायतका बिषयहरुको भण्डाफोर समेत गर्ने बताइएको छ । त्यस्तै आगामी स्थानीय निर्वाचन गठबन्धनको पक्षमा प्रभावकारी वनाउन नेपाली काङ्ग्रेसका नेता गोविन्द ढुंगानाको संयोजकत्वमा ६ सदस्यीय समिति समेत गठन गरेको छ ।

उक्त समितिको सदस्यहरुमा नेपाली कांग्रेसका जिल्ला सभापति अर्जुन तुम्बाहाङ्फे, माओवादी केन्द्रका जिल्ला अध्यक्ष इन्द्र इम्सङ, नेकपा एसका अध्यक्ष कृष्ण चोङबाङ, जसपाका अध्यक्ष भगवानमान रिजाल तथा संघीय लोकतान्त्रिक राष्ट्रिय मञ्च संघीय लिम्बुवान प्रान्तीय मञ्चका जिल्ला अध्यक्ष बिजय निङलेकु रहको जनाइएको छ ।

२ नगरपालिका र ४ गाउँपालिका साथै ४३ वटा वडा रहेको तेह्रथुममा समग्रमा सहमति गरेर गठबन्धनले चुनाव लड्ने योजना सहित मोर्चा गठन गरिएको संघीय मञ्चका सहसचिव सेसेहाङ चोङबाङ्ले बताएका छन् ।