विराटनगर, २० फाल्गुन । प्रदेश १ को नाम कोशी राखेको विरोधमा शुक्रबार विराटनगरमा प्रदर्शन भएको छ । बुधबार प्रदेशसभाले कोशी नाम राखेपछि उक्त नाम खारेज गर्न माग गर्दै पहिचान पक्षधरले प्रदर्शन गरेका हुन् ।

किरात याक्थुङ चुम्लुङकाे संयोजनमा बनेको लिम्बुवान किरात संयुक्त संघर्ष समितिमा आवद्ध विभिन्न राजनीतिक दल र संघसंस्थाहरुले शुक्रबार मुख्यमन्त्री तथा मन्त्रिपरिषद कार्यालय घेराउ पनि गरेका हुन् । उनीहरुले पहिचानको आधारमा लिम्बुवान–किरात नामकरण गरिनुपर्ने माग गरे । प्रदेशको नाम पहिचानका आधारमा नराखे देशभरि आन्दोलन चर्काउने उनीहरुले चेतावनी दिए ।

संघीय लोकतान्त्रिक राष्ट्रिय मञ्चका अध्यक्ष कुमार लिङ्देन मिराकले प्रदेशको नाम खारेज गरेरै छाड्ने चेतावनी दिएका छन् । उनले यदि यसो नभए गृहयुद्ध सम्म हुन सक्ने चेतावनी दिएका छन् । कार्यक्रममा कियाचू अध्यक्ष प्रेम येक्तेन, जसपाका नेता मातृका धिमाल लगायतले नाम खारेज नभए सडकबाटै नाम लेखाउने चेतावनी दिएका छन् ।

यसैगरी संघर्ष समितिले फाल्गुन २० र २१ गते स्थानीय तह लगायतका कार्यालयहरुमा तालाबन्दी गर्ने । २२ गते तराई क्षेत्रको स्थानीय तहहरुमा कालो झण्डा गाड्ने र कोणसभा गर्ने । कार्यालयहरु तालाबन्दी गनेै त्यसैगरी २३ गते पहाडी जिल्लाहरुमा गर्ने र २४ गते संघर्ष समितिलाई वडा तहसम्म थप शसक्त बनाउने र आम हड्ताल सहितको कडा आन्दोलन घोषणा गर्ने कियाचू अध्यक्ष येक्तेनले बताए ।

९३ सदस्यीय प्रदेशसभामा कोशीको पक्षमत ८२ जनाले मतदान गरेका थिए । ४ जनाको विपक्षमा मतदान गर्दा ६ जना सांसद अनुपस्थित थिए ।