काठमाडौं, २५ फागुन । कांग्रेस नेता रामचन्द्र पौडेल मुलुकको तेस्रो राष्ट्रपतिमा निर्वाचित भएका छन् । आज बिहीबार संसद भवनमा सम्पन्न निर्वाचनमा अत्यधिक मत प्राप्त गरेर नेता पौडेल राष्ट्रपति निर्वाचित भएका हुन ।

पौडेलले ३३ हजार ८ सय २ मत प्राप्त गर्दा उनका प्रतिद्वन्द्वी एमाले उपाध्यक्ष सुबास चन्द्र नेम्वाङले १५ हजार ५ सय १८ मत पाए । २०६५ जेठ १५ गते नेपाल संघीय लोकतान्त्रिक गणतन्त्र घोषणा भएपछि नेपालमा राष्ट्र प्रमुखका रूपमा आलंकारिक राष्ट्रपति चुन्न थालिएको हो ।

उनी भन्दा अगाडि तत्कालीन कांग्रेस नेता रामवरण यादव नेपालको पहिलो राष्ट्रपति निर्वाचित भएका थिए ।

त्यस्तै पहिलो महिलाका रूपमा तत्कालीन एमाले उपाध्यक्ष विद्यादेवी भण्डारी देशको दोस्रो राष्ट्रपति निर्वाचित भएकी थिइन् । उनी दुई कार्यकाल सो पदमा आसिन रहेर भर्खरै पदमुक्त भएकी हुन् ।

राष्ट्रपति निर्वाचनमा राष्ट्रिय सभाका ५८, प्रतिनिधिसभाका २७२ र प्रदेश सभाका ५५० सांसद मतदाता थिए । जसमा संघीय संसद् (प्रतिनिधिसभा र राष्ट्रियसभा)का ३१३ तथा प्रदेशसभाका ८१८ सदस्यले भोट हालेका थिए ।